Despues di un serie di discusion di plan di turismo pa e proximo añanan, Minister di Turismo a expresa e importancia di e proceso di dialogo cu tabatin cu e diferente partidonan envolvi (stakeholders), incluyendo AHATA.
Segun e mandatario, a tuma luga 3 sesion amplio na mesa cu mas di 30 stakeholder. E dialogo aki ta algo cu despues di hopi tempo y añanan a wordo realisa pa asina discuti e diferente tema- y preocupacionnan relaciona cu e rumbo di turismo.
Turismo ta rekeri un balansa di interes
E minister a remarca cu den e sector di turismo tin diferente interes cu mester tene den consideracion. E enfoke no por ta solamente riba interes di un solo grupo, organisacion, of stakeholder. “Un organisacion of un stakeholder no por determina e rumbo di turismo di Aruba,” e minister a subraya, enfatisando cu e interes general di e pais mester prevalece riba interes di un solo grupo.
Un documento den desaroyo
Tocante e desacuerdo manifesta den comunicadonan di AHATA, e minister a indica cu e ta tuma nota di nan opinion y prerogativa. Por ta tin desacuerdo riba e contenido, pero no riba e proceso di dialogo, mirando cu tur partido mes a confirma cu tabatin e espacio pa sinta na mesa despues di hopi tempo.
E mandatario a aclaria cu e plan no ta un documento faha den piedra (“written in stone”), sino un documento den desaroyo cu ta keda evoluciona y cambia a base di e perspectivanan cu ta ricibi.
E proceso lo sigui di ta uno positivo y di dialogo, unda lo ahusta locual ta posibel pa asina yega na un documento final cu ta sirbi e miho interes di Aruba.
