E tormenta tropical Isaias, cu a forma diaranson den Golfo di Mexico, ta move den direccion noordoost y segun e pronostico por bira fuerte y asina ey diahuebs bira un horcan prome cu e yega cerca di costa nort di Golfo di Merca. Esaki ta segun informacion di Centro Nacional di Horcan (NHC) di Merca.
E centro di Isaias tabata aproximadamente 460 kilometer (285 miya) west di Progreso, Mexico, y 935 kilometer (580 miya) zuidwest di riu Mississippi, na Merca.
E tormenta tabata move den direccion oost-noordoost na un velocidad di aproximadamente 13 kilometer pa ora (8 miya pa ora), cu biento di 65 kilometer pa ora (40 miya pa ora) y rafaga mas fuerte.
Segun NHC, diahuebs Isaias ta pasa noord di peninsula di Yucatan y diabierna ta yega cerca di costa nort di Golf di Merca. P’esey, autoridadnan por emiti aviso di horcan pa parti di e zona.
E tormenta ta trece entre 5 y 10 centimeter (2 te 4 duim) di awasero te diahuebs den zonanan costero di Bahia di Campeche. Den algun luga, e cantidad di awasero por ta mas halto.
Entre diabierna y fin di siman meteorologonan ta spera entre 7,5 y 15 centimeter (3 te 6 duim) di awasero na costa nort di Golfo di Merca, desde zuidoost di Louisiana te Panhandle di Florida. Na algun luga, e cantidad por yega te 25 centimeter (10 duim).
Isaias ta e di nuebe tormenta cu tin nomber den e temporada di horcan di Atlantico. Prome cu Isaias tabatin Arthur, Bertha, Cristobal, Dolly, Edouard, Fay, Gonzalo y Hanna.
Te cu awo, e temporada di horcan den Atlantico tin un marca historico, pasobra ningun horcan a forma ainda. E meteorologonan ta relaciona e situacion aki cu e fenomeno El Niño, cu ta implica temperatura di awa mas halto di loke ta normal den Ocean Pacifico. E fenomeno por registra un intensidad historico e aña aki.
Dia 6 di augustus Oficina Nacional di Administracion Oceanico y Atmosferico di Merca (NOAA) a baha su pronostico p’e temporada di Atlantico. E organismo ta calcula un maximo di 13 tormenta cu nomber, un cantidad bou di promedio historico.
Pa Ocean Pacifico oriental, sinembargo, NOAA ta calcula te 22 tormenta, un cantidad riba promedio, debido na fortalecemento di fenomeno El Niño.
Leyenda
Potret 1
Potret di satelite tuma pa Oficina Nacional di Administracion Oceanico y Atmosferico (NOAA) via Centro Nacional di Horcan (NHC) Mericano unda ta mustra e localisacion di e tormenta tropical Isaias den Golf di Mexico, EFE/NOAA-NHC.
Potret 2
Imagen di Oficina Nacional di Administracion Oceanico y Atmosferico (NOAA) via Centro Nacional di Horcan (NHC) Mericano unda ta mustra e pronostico di e trayectoria di tormenta tropical Isaias den Golf di Mexico direccion pa Merca, EFE/NOAA-NHC.
