Minister Ursell Arends ta den un maneho di locura. A caba di pega un barco cu Embassy Suites diahuebs merdia. Ta minister y traha drechi ta dos cos diferente. Ta un berguensa pa bo mira con gobierno ta matando comercio cu belasting.
Hopi comerciante ta pensando si ta bale la pena sigui cu negoshi. Awendia bo ta traha pa solamente paga belasting. E comerciantenan a laga sa cu ultimo binti aña cu nan tin ta haci negoshi, nunca di nan bida a haya ta paga asina hopi belasting manera t’e caso aworaki.
Gobierno ta matando comercio cu tur tipo di cobransa di belasting. Gobierno ademas no ta yuda comercio pa por sigui haci negoshi tampoco. A presenta un caso caminda minister Ursell Arends ta na altura di dje. A notific’e por escrito pero e mandatario no tin e decencia di contesta e carta tampoco.
Na Aruba nos tin un compania cu a haya un licencia pa transporta carga cu avion. Nan tin nan mesun avion. Ta prome y unico compania cu a logra pa prome biaha un licencia pa por transporta carga entre e islanan den reino Hulandes. Ta conoci cu e frontera aereo entre Aruba cu Venezuela ta cera. Corsou si a habri su frontera aereo y maritimo.
Mirando cu e espacio aereo entre Corsou y Venezuela ta habri, e compania local cu tin su licencia, a acerca gobierno di Corsou cu a duna OK oficial cu un carta p’e compania di Aruba por sali di Aruba y bay Corsou, djey sali di Corsou bay Las Piedras pa hiba of busca carga y bin bek Corsou.
Ora cu a kere cu via Corsou por sigui e ruta pa Aruba cu e carga, a resulta cu no mag. Como compania di Aruba cu licencia pa bula cu carga entre ABC, bo mester laga e carga na Corsou y otro avion mester tuma e carga y trece Aruba.
Ki locura esaki ta. Esaki t’e maneho di gobierno y e minister responsabel ta Ursell Arends. Pa mustra con abusado gobierno y Ursell su maneho ta contra negoshi Arubiano, e aerolineanan manera Avianca ta bula Venezuela pa Colombia y djey bin Aruba cu carga y pasahero. COPA y DHL ta bula Venezuela pa Panama cu carga y sigui pa Aruba cu e carga cu ta destina pa Aruba for di Venezuela.
Pero un compania di Aruba cu a haya OK di gobierno di Corsou pa un aña bula e ruta entre Corsou y Venezuela cu carga, ta stroba na Aruba di yega cu e carga via Corsou. Un ridiculez grandi.
Mirando cu minister Ursell Arends ta asina cobarde pa contesta, ta obliga pa bay corte pa mustra hues e ridiculez di un gobierno na Aruba. Mustra hues con incapaz un minister por ta. Ta laga tur aerolinea no local bula y trece carga di Venezuela via Panama y Colombia, pero un compania di Aruba cu su licencia di carga no mag pasando via Corsou.
Esaki nos ta yama un bon madrastra pero mal mama. Bo mes yiunan bo ta laga na caya pero aerolineanan no local mag di haci loke abo no mag haci. Unico cos cu si gobierno kier ta pa bo paga mas y mas belasting cu dado momento ta disgusta bo si ta bale la pena sigui haci negoshi.
