Minister di adulto mayor, Ursell Arends a reuni cu e Raad van Toezicht di SABA relaciona cu e rapport di SABA. A palabra cu asina haya e rapport di “Ouderenzorg en perspectief” for di e grupo di tarea, lo analis’e y cuminsa tuma paso necesario. Den luna di october lo tuma luga un forum di adulto mayor, caminda cu tur stakeholders ta bini hunto y vocifera kico kier mira otro, presenta vision y cambionan pa futuro.
E stapnan cu minister ta kere aden y cu e grupo di trabou a pidi ta na su luga, esta haci un investigacion interno den SABA p’asina sa realmente kico ta e situacion y unda por mehora. E ‘stukkenonderzoek’ cu a haci tabata solamente riba cinco punto y pa cu esey, e minister lo cumpli cu e puntonan presenta. E posicion huridico di e trahadonan di SABA pronto lo cumpli cu ne. E ta na su luga pa asina cu aproba e presupuesto supletorio den Parlamento di Aruba, pa e trahadonan ricibi nan placa cu nan tin derecho riba dje. Tin trahado cu tin aña ta wardando.
E minister ta di opinion cu e diferencia di opinion entre SABA, gobierno y Raad van Toezicht; no mester afecta e trahadonan, pa cual lo cumpli cabalmente cu e puntonan presenta. E pago lo tuma luga e aña aki ainda. Ta trahando duro pa surpasa e diferencia di opinion cu e gerencia y gobierno tin cu otro p’asina yega na un meta comun. E meta ta; e adulto mayor y e trahadonan di SABA.
E derecho di trahadonan ta algo importante y tin cu respet’e. Riba 4 di september ultimo, fraccion di AVP a presenta un mocion den parlamento caminda a urgi gobierno pa; haci tur posibel pa otorga e sumanan necesario na SABA p’asina SABA por cumpli debidamente cu e empleadonan y percura pa un cuido optimal di nos grandinan incluyendo e trato medico specialisa necesario pa nos grandinan. E mocion aki no a conta cu sosten den mayoria den parlamento, coalicion den su totalidad a vota contra y tambe parlamentario do Nacsimento, Gunn y Lopez. E minister mes ta sinti cu e tabata un bon mocion, pero e ultimo punto di mocion ta basa riba mentira, pa cual e mes a duna un ‘negatief stemadvies’ riba e mocion.
