Dialuna mainta dilanti dump na Parkietenbos a tuma luga e anuncio oficial di Minister Arends, caminda conhuntamente cu e otro stakeholders manera BCI, Serlimar, Carentra y Ecotech Freezone a anuncia e prome paso unda cu lo redirigi e prome tipo di desperdicio, cual ta taira.
“Despues cu 22 di februari, 2022 ultimo a inicia e proceso pa bin cu un maneho di desperdicio nobo pa Aruba. Awe 6 luna despues mi ta orguyoso pa bisa cu e prome stap a wordo haci“, Minister Arends a cuminsa bisa. “Awe nos prome stap pa cumpli cu e promesa cu nos tin cu Edan – y nos futuro generacion – a wordo haci. Tur esaki ta parti di un vision pa no solamente cera Parkietenbos, pero tambe pa cuminsa enfoca riba reduci, re-uza y recicla desperdicio, y facilita e transicion di Aruba basa riba principionan circular (economia circular).”
Despues di e Pitch & Switch event cu a tuma luga 22 di maart, 2022 ultimo, Gobierno a haya un amplio bista di kico ya caba por na Aruba pa loke ta trata procesa, recicla y re-uza. A revela cu ya caba tin algun experticio local cu por recicla desperdicio den un manera responsabel y duradero. Cu e redireccion di taira e prome stap di e proceso pa elimina e candelanan, cera y remedia dump di Parkietenbos pa transforma e area den un Parke Solar a inicia.
“Como comunidad y ciudadano Arubano nos tin un reponsabilidad pa nos generacionnan despues di nos,“ Minister Arends a continua bisando. “Mi vision ta pa cera Parkietenbos mas pronto cu ta posibel y redirigi tur sushi unda por procesa nan responsabelmente. Pero pa nos logra esaki ta rekeri entre otro, comprension y sosten di comunidad y colaboracion y cooperacion entre sector publico cu sector priva.
Di parti di Gobierno di Aruba, minister Ursell Arends ta gradici di antemano e cooperacion di comunidad y esnan den sector publico y priva cu tambeb ta mira e necesidad pa nos cuminsa cu separacion di desperdicio riba nos pais pa un miho futuro pa nos yiunan mañan.
