Dialuna despues di e blackout, por a ripara cu den varios bario tabatin problema cu presion di awa. “Nos ta na altura di e critica aki”, asina ing. Alfredo Koolman a contesta ora a puntr’e durante e conferencia di prensa. El a spica cu net na momento aki ta haciendo un trabou grandi riba Tanki di Alto Vista y cu ta uzando coriente pa regula e presion den e bario. Ora coriente a bay, di mes cu presion di awa ta bira un reto y den algun area specifico, hasta no tabatin suministro di awa mes!
Ta conoci cu WEB Aruba NV tin un proyecto na Alto Vista, unda cu nan lo bay reemplasa e tanki di awa aki. Den cuadro di e proyecto aki, segun Alfredo Koolman, Director di WEB Aruba NV, algun siman atras, e tanki aki a cuminsa haya problema, pa mesun motibo cu su tempo a yega. A bah’e pendiente di e permisonan cu e departamentonan concerni pa aprobacion pa construi un nobo. Lo baha e tanki aki definitivo, pa bash’e abou.
WEB Aruba NV lo keda zorg pa e suministro di awa keda stabiel, pa e bario di Noord, cu ta riba presion di pomp. WEB tin pomp na entre otro na Paradera cu ta mantene e suministro di awa y presion tambe. Ora no tin coriente, e presion tampoco t’ey.
Algun keho ricibi tabata cu algun hende lo a haya un smaak straño den e awa, pa cual Koolman a pidi pa e clientenan aki tuma contacto cu WEB Aruba NV. Sa pasa cu ora haci cambio den operacion, por haya un cambio den smaak, un otro color, pero mester tuma medida pa awa di calidad yega na e usuarionan.
