Dump di Parkietenbos lo cera su porta pa publico entrante prome di januari 2023. Kico ta bai pasa cu nos sushi?
Aruba su infrastructura di desperdicio ta den fase di infancia, y maneho optimal di desperdicio ta solamente na su inicio. Den pasado no a pone enfasis pa desaroya un industria responsabel y duradero di desperdicio, cual a conduci na un cero na Dump di Parkietenbos cu a sigui crece incansablemente.
Nada no ta cambia, si nada no cambia. E ta importante pa compronde cu e infrastructura pa un economia circular y pa por tin un industria amplio di reciclahe etc. ainda no ta na su luga debido. No obstante, ya caba Aruba tin suficiente opcion pa por cuminsa e transicion pa redirigi desperdicio, y desaroya un industria robusto cu debido tempo.
Si no na dump, na unda anto? Ya for di algun aña Serlimar mes no ta dump desperdicio residencial of comercial na Parkietenbos mas, pero via Ecotech pa esakinan por wordo procesa pa wordo hiba den bales na Ser’i Teishi. Na e facilidad di Ecotech tin ploeg cu ta separa desperdicio pa asina “rescata” mas hopi posibel di wordo tira afo. Loke no por reuza of bende, ta ser compacta y deposita den un forma organisa – esaki den contrast cu benta tur cos abiertamente, y kima cierto desperdicio den aire liber manera tabata tuma luga na Parkietenbos.
Cualkier solucion cu no ta encera “open dumping” y “open burning” ta un paso den e bon direccion, y ta representa un salto grandi for di decadanan di in-accion. Esaki ta un di e principionan cu Minister Arends a bin ta splica, cu un Sanitary landfill (manera Ser’i Teishi) ta un paso den e bon direccion a corto plaso – cual no mester descurasha nos di ambicionnan a largo plaso.
Na e momentonan aki te ainda no tin necesidad pa separa sushi na cas – aunke ta premira esaki como posibilidad den futuro. Pa e personanan cu ta hardinero, contratista, of ta gusta hiba nan mesun sushi di cas pa dump, lo tin diferente localidad pa deposita diferente tipo di desperdicio.
Ministerio di Naturalesa recientemente a publica un “Blueprint” cu ta indica tur e diferente localidadnan posibel pa deposita desperdicio, y lo sigui amplia e lista aki cu tempo – invitando mas y mas compania pa forma parti di e solucion. Lo tin mas opcion den futuro cercano na caminda pa hiba otro tipo di desperdicio, cu e meta cu e companianan aki lo recicla mas tanto posibel. Desaroyo di nos maneho di desperdicio optimal ta simplemente na su inicio.
