Gloria Sheila Paul-Thompson, miho conoci como Sheila, a bira miembro di Women’s Club of Aruba (WCA) durante aña di club1974-1975. E tabata un miembro masha activo den comision di Welfare (Bienestar), Limpi y Dress a Child.
Den e comision di Welfare, e tabata tin hopi dedicacion pa nos grandinan y tur luna e tabata presente pa entretene nan cu bingo y celebra cu nan na Huize Maris Stella na Savaneta y na Cas di Cuido na San Nicolas.Y den e comision di Dress a Child, e tabata encanta atende nos muchanan cu nan pañanan pa fin di aña.
Semper e tabata di gran ayudo, caminda tabata tin mester. El a traha incansablemente den e comision di Health (Salud), principalmente den e proyecto di Saminacion di Pecho, cu WCA tabata organisa pa e parti cu ta toca San Nicolas y tambe a duna un gran aporte na e comision di AIDS Awareness.
E tabata un persona artistico y creativo den e obranan di man, cu nos tabata traha pa bende durante nos Christmas Bazaar.
El a haci un carera fantastico pa loke ta trata trabou boluntario. E tabata un persona cu ta papia poco y ta haci hopi. Un Shon di hende! Na 2014 el a wordo reconoci como Life Member di WCA, despues di tabata miembro pa mas di 40 aña largo.
Cu esaki WCA ta manda sincero condolencia na su yiunan, demas famia Paul-Thompson, su famia di WCA y su bon amistadnan.
Cu nos Life Member Sheila sosega na paz den Reino di Señor!
