Meta ta pa mehora servicio, enforsa Serlimar financieramente y crea oportunidad di adelanto pa empleadonan.
Minister encarga cu Infrastructura y Medio Ambiente Otmar Oduber a reuni na Serlimar unda 
cu a scohe pa pone tur e personal di Serlimar bini hunto, pa splicanan e meta di unda kier yega, pa conhuntamente haci Serlimar un organisacion fuerte, pa cual tin hopi trabou pa haci.
Pa loke ta encera e trabou cu Serlimar ta eherce den comunidad, ta mira cu poco poco Serlimar a cuminsa gana e confiansa di comunidad basa riba e calidad di servicio cu ta wordo brinda na e casnan cual a wordo mehora drasticamente. Aworaki mester bay percura pa duna servicio adicional na comunidad di Aruba.
Tin hopi ideanan nobo pa asina crea mas entrada pa Serlimar (cu ta sumamente importante na e momentonan aki), pero importante ta pa nos duna balor na e trahadornan tambe, combersa cu nan, mustranan riba e direccion cu nos a scohe p’e. A informa riba e steering committee pa locual ta trata e maneho di Parkientenbos y e aspecto di e maneho di desperdicio completo aki na Aruba. 
Serlimar por keda Sui Generis pero no den e forma cu e ta aworaki. ‘MI ta custumbra cu un ATA y ANSA cu tabata sumamente exitoso, pa motibo cu a delinea for di salida, kico ta e meta cu kier logra. Lamentablemente esaki no a tuma lugar cu Serlimar. Semper a keda haci politica cu e organisacion aki, siendo cu e ta un organisacion sumamente importante pa loke ta encera salubridad y maneho di sushi di Aruba.’
Concluyendo Minister Oduber a bisa cu e meta ta pa haci e base di Serlimar solido, brinda servicio, genera fondo pa Serlimar ta fuerte y pa e trahadonan por sinti cu nan ta bay dilanti den e proceso. Un NV ta brindabo e oportunidad pa bo mes haci bo financiamentonan y pa organisa y profesionalisa pa brinda mihor servicio na comunidad. Esaki ta locual empleadonan a indica di ta locual cu nan ta desea di mira tambe na Serlimar.
