Manera por a lesa den un publicacion anterior, e ciudadano Yamile del Rosario Burgos-Tromp a acerca 24ora.com pa haci un denuncia publico contra di Departamento di Salud Publico (DVG) pa motibo cu, segun su opinion, ta debe placa di salario.
A tuma oportunidad di entrevista cu Minister di Salud Publico, Danguillaume Oduber na e reunion di tratamento di presupuesto 2022 den parlamento pa pidie su reaccion encuanto e caso aki. El a indica cu el a tuma nota di dje pa prome biaha diahuebs den media. Obviamente, door di su presencia henter dia den parlamento, no por a profundisa den dje.
Asina mes, e mandatario a compronde for di DVG cu “e persona aki tin un overeenkomst van opdracht” caminda ta stipula como un di e condicionnan e paga a base di condicion di “no work no pay”. Adicionalmente, Minister Oduber a duna di conoce cu ta den transcurso di awe e ta spera di por haya mas detaye.
