“Awe mi ta sinti hopi contento y satisfecho cu nos por a amplia nos capacidad di Intensive Care Units (ICU), medicamento y remedi di 6 pa un total di 33 unidad di ICU.
Prome cu e crisis di Covid-19 nos tabatin solamente 6 unidad di ICU. Riba propio forsa nos a amplia esaki na 21 unidad”, asina Minister Dangui Oduber a anuncia un rato pasa despues cu e materialnan medico a yega Hospital. Tabata bisto cu e mandatario ta sinti un alivio di e hecho cu Aruba ta miho prepara pa enfrenta e pandemia aki.
“Como Minister di salud publico mi a haci peticion na Gobierno Hulandes pa nos amplia nos capacidad di ICU cu 12 unidas mas! E no tabata facil y mi a hiba e lucha aki pa mi pais Aruba y nos a logra awe”, asina Minister Dangui Oduber a bisa cu un sonrisa di satisfaccion riba su cara.
Cu e ampliacion aki Aruba a yega na un total di 33 unidad di ICU. Hulanda lo yuda cu personal medico tambe. Awe tur e ekiponan a yega Aruba y entrega na Hospital. Sigur un logro grandi y un paso mas cerca pa un dia nos bolbe na normalidad.
“Sigur un danki na Gobierno Hulandes y Staatssecretaris Blokhuis pa e cooperacion y yudansa brinda den momento di crisis. Nos ta aprecia esaki. Mi ta convenci NOS ta bay logra!”
