Durante rueda di prensa Minister di Finansa a bay riba e parti di overtime, cual topico e sindicatonan no ta mucho di acuerdo cu ne. Esaki ta bin pasobra kier paga 40 ora di overtime, pero si traha mas cu esey e ora ta bay na timeback.
A puntra Minister di Finansa, mr. Xiomara Maduro, riba e echo cu polis, CEA, brandweer por ta trankil cu nan ta haya placa di overtime y cu e memorandum no ta conta p’e departamentonan aki. E mandatario a indica cu e conclusion ey no ta cuadra. El a enfatisa cu den e circulario ta duidelijk poni kico ta locual su persona a splica durante e presentacion.
A indica cu ta 40 ta paga pa persona, y tur loke ta riba 40 ta haya cu timeback. E mandatario a splica cu minister Rocco Tjon a sinta cu e parti di cadena hudicial (justitiële keten), pasobra un di e puntonan den e circulario ta cu mester presenta un planificacion (planning). Den esaki nan por sigura e ora cu ta baha e ora di overtime, pero di otro banda keda mantene e parti di siguridad.
E mandatario sa cu e no ta un trabou facil, pero ta algo cu nan mester atende cu ne pais y ta haciendo esey. P’e parti cu nan a bisa di no ta paga, e mandatario a duna un splicacion cuanto ta paga. Tambe el a bisa pakico ta e urgencia di e biaha aki cu ta e parti di likides.
MOTIBO CU A CAP NA 40 ORA
Minister Rocco Tjon a sinta cu e parti justitiële overleg, esta tur grupo cu ta traha den e parti ehecutivo di siguridad pasobra eynan ta caminda cu e overtime ta mas halto. Nan a atende cu e asunto aki. Di otro banda na momento cu minister presidente a haya e informacion cu ta bay surpasa e fondonan cu tin disponibel pa overtime, e ora a saca e circulario pa indica kico ta bay pasa.
Di a cap e na 40 ora, segun Maduro, esaki ta informacion cu no ta cos nobo. E rapport por ehempel di ARA, a mustra cu e problematica aki no ta algo cu a bini di awo. Loke ta diferente ora a traha e rapport ta e falta di likides. Segun e mandatario, a paga tur esakinan debi cu otro departamento por ehempel no a uza tur nan overtime. Esey ta pone cu a keda fondo disponibel, por a uza e placa pa paga.
E mandatario a splica cu polis a uza ocho miyon florin di e dies miyon cu nan tin, e mandatario a enfatisa cu nan ta bay surpasa. P’esey di awo caba mester trek aan de bel pa no yega den un situacion cu a haci e trabou, pero no por duna e pago. P’esey minister presidente mester sali cu e circulario pa brinda e atencion. Maduro a enfatisa cu loke nan ta tratando aworaki, no ta algo cu e aña aki a sali afo ta un problema pero ta uno caba. E diferencia ta cu e aña aki e ta bira un problema mas grandi.
