Minister di Finansa a informa un rato pasa cu e ta deshaci di e plan pa cobra impuesto di entrada riba plac’i tip di esunnan cu ta traha den un negoshi cu sa ricibi tips di cliente. “No ta bay cobra belasting riba tips”, asina el a skirbi riba su pagina di Facebook riba diamars anochi.
“E proposicion final pa reforma fiscal ta consisti di varios cambio y den esaki no tin cobransa di impuesto riba tips. Tin varios punto cu tabata poni den e prome proposicion cu awor aki no ta aden mas y cobransa riba tip ta un di nan. E proposicion final ta wordo anuncia e luna aki”, di acuerdo cu e mandatario.
Mester menciona cu for di e gremio comercial, sindical y politico tabatin masha reaccion awe riba e tema aki. E berdad ta cu mayoria di nan no a scucha nada mas di e idea aki. Berdad a yega di mira e intencion di Minister Xiomara Maduro, pa den cuadro di ehecucion di e landspakket cu lo a bin cu e medida aki, pero ta parce cu despues a reina un silencio total. Pero, cu AHATA, KVK y FTA papiando riba e tema mescos cu Fraccion di AVP den Parlamento, a haci cu a activa mesora pa anuncia cu e plan lo keda den lachi warda.
Probablemente e cambio di pensamento aki ta bin den e mesun luz cu a cambia cobransa di “eigen bijdrage” y otro cobransanan adicional cu AZV a anuncia den nan pakete di medida. Asina cu pueblo mustra oposicion pa cu e proposicion, ta haci cu e politico ta cambia di posicion mesora. Asina a menciona den e pakete cumbini cu Gobierno di Hulanda cu lo introduci BTW na januari 2023 y ainda no por menciona cuanto e lo bira ni si ta un cobransa of dos. Den e mesun luz di reforma fiscal, a menciona cu lo cobra impuesto di entrada riba tur entrada di e trahado, cu ta inclui su plac’i tips. Pero obviamente e idea di Minister di Finansa, Xiomara Maduro, no a cay den bon tera cerca pueblo trahado, pa cual probablemente presion den pueblo a causa cu na final a anuncia awe cu a sac’e di e lista di medidanan cu ta drenta na vigor despues di tira pagara y canta Dande e fin di aña’ki.
