Tur hende na Aruba sa con e situacion di pilar economico turismo ta, desde cu a conoce e situacion di COVID-19 y tur consecuencia cu el a trece cu ne. Na mes momento a realisa cu Aruba mester di otro desaroyonan, otro pilarnan economico. Pa cu esaki e Departamento di Infrastructura y Planificacion (DIP) ta bay lansa su maneho nobo pa tereno di huur (huurgrond).
Aruba semper a depende di importacion di productonan di alimenticio. Siguridad di cuminda (Food Security) ta un aspecto sumamente importante p’e economia y mester atende cu ne di biaha, mirando e circunstancia cu Aruba ta den. Segun Minister di Desaroyo Teritorial, Infrastructura y Medio Ambiente, drs. Marisol Lopez-Tromp, e caida di importacion di fruta, di berdura y pisca di Venezuela desde 2017 pa motibo di crisis politico y economico di Venezuela, a crea un problema pa Aruba. Tambe den e situacion actual di Salubridad Publico regardando COVID-19, tur loke e ta trece cu ne ta mustra con vulnerabel den e parti di alimento aki Aruba ta.
P’e motibo aki Gobierno kier pa localmente cuminsa produci productonan alimenticio na un escala mucho mas grandi. Naturalmente esaki ta un di e sectornan prometedor. Gobierno a stipula den su maneho economico di 2019 pa 2022 y den cuadro di esaki DIP kier stimula e sector aki por medio di uzo e terenonan di huur hopi mas efectivo.
Segun e mandatario pa crea y apoya e sector primario sostenibel, mester stimula formacion y crecemento di negoshinan chikito y mediano. Den e caso aki DIP ta adapta e maneho y otorgamento tereno di huur pa sector primario. Entrante dialuna awo lo tin re-inscripcion di tur persona of compania aki na Aruba cu a haci un peticion di huurgrond pa sector primario te cu awo, pero tambe persona of compania cu a haci peticion pa extension di acuerdo cu por a vence. E departamento ta anuncia cu tin oportunidad tambe pa inscripcion nobo pa esnan aworaki ta inicia cu plantamento pa persona of companianan cu no a entrega papel na DIP ainda. E mandatario a ricibi diferente comentario di hendenan cu a yega di bay e departamento pa paga por ehempel tereno di huur no por a haci esaki na tur ocasion.
Loke cu a sosode ta cu unabes gobierno a sinta a bin topa un situacion cu mester a reinforsa DIP. E departamento tabatin un retraso grandi ora cu gobierno a sinta na 2017. E prome prioridad e tempo ey a inicia cu entregamento di carta di reservacion pa ciudadanonan cu ta riba lista di espera pa cas. Hopi ciudadano cu a ricibi, a base di peticion tereno pa cas, e oportunidad pa construi esaki. Awo a toca turno pa haci den e cuadro di necesidad cu tin na Aruba, pa pone un atencion mas grandi riba terenonan di huur.
Gobierno sa cu tin cunukeronan cu ta planta pa hopi aña. Segun Lopez-Tromp, nan kier percura cu entrante dialuna tur persona cu tin un huurgrond of ta desea di extende e acuerdo aki, of ta desea di bay cuminsa planta aki Aruba, pa dirigi nan mes na e re-inscripcion aki of inscripcion nobo. Tur esaki lo ta desde 20 di April y lo ta vigente te cu 25 di mei proximo. Den e periodo aki lo trata y evalua tur peticion, entre otro segun planificion y maneho di Ruimtelijk Verordening aki na Aruba.
E situacion di “Shelter in Place” ta nifica cu e departamento ta cera pa publico, pero esey no ta kita cu un team a sigui traha preparando tur esaki pa comunidad. Esnan cu ta interesa e periodo aki pa aplica pa tereno di huur, tin cu participa den e re-inscripcion. Pa aplica esaki ta bay na e website www.dip.aw pa haya e informacionnan di re-inscripcion y inscripcion nobo. Riba e website lo tin e formularionan, unda cu mester yena algun dato personal, di compania. Tambe mester haci un pago via banco. E mandatario a bisa cu e suma ta conforme e leynan di Aruba y esaki ta di 35 florin. Den e proximo dianan lo duna un splicacion mas extenso riba e pasonan. Minister Lopez-Tromp ta spera cu henter comunidad cu ta activo den e sector aki, esnan cu a acudi den pasado pa prolonga of extende nan acuerdo, of esnan cu ta desea ta bay inicia cu plantamento, pa haci bon uzo di e oportunidad aki.
