Resientemente, Minister di Tráfiko, Transporte i Planifikashon Urbano Señora Jesus-leito a firma un akuerdo ku Corendon kaminda ta duna nan e promé opshon pa e tereno pariba di Holiday Beach Hotel. Ta trata aki di un tereno di mas o ménos 38 mil meter kuadrá, kual su destinashon ta pa amplia e hotèl ku Corendon resientemente a atkerí.
Ku e akuerdo aki Gobièrnu a palabra ku Corendon mester kumpli ku algun punto denter di poko. Algun di e puntonan aki ta, entre otro
- Destinashon di e tereno aki ta solamente pa ekspanshon di e hotèl;
- Corendon mester entrega un plan detayá ku informashon i mapa di kon e edifisio, parker, i parti di paisahe lo bini;
Na momentu ku Corendon kumpli ku tur e kondishonnan palabra den e akuerdo aki denter di e tèrmino stipulá, Gobièrnu lo sòru di traspasá e tereno aki pa nan den forma di erfpacht.
Un grupo di trabou di Domeinbeheer huntu ku Servisio pa Planifikashon Urbano (ROP) a hasi tur e preparashonnan pa logra yega na puntonan di salida di e akuerdo aki. Den esaki a tuma konseho tambe di ekspertonan lokal.
Minister Jesus-Leito a firma e akuerdo aki ku Sander Winterberg, direktor di Corendon Curaçao, den presensia di kolega ministernan komo parti di Gobièrnu su ‘Investment team’, esta Minister Presidènt, Minister di Finansa, i Minister di Ekonomia.
