Minister demisionario di Finanzas Hoekstra (CDA) prome cu el a bira minister, pa varios aña tabata tin un cuenta offshore na Virgin Islands Britanico. Asina varios medio di comunicacion Hulandes, e.o. Trouw, Financiele Dagblad a informa. Via e colectivo periodistico internacional ICIJ nan tin acceso na 12 miyon documento cu leak di e trustkantoornan: e asina yama Pandora Papers.
Nomber di e compania ta Candace Management y mas o menos 40 persona ta involucra, den cual tin varios persona di e mundo bancario Hulandes. Nan ta inverti den e compania di safari na Oost- Afrika. Legalmente no ta prohibi pa haci uzo di incentivo fiscal. Pero e concepto ta dudoso, segun e investigado Karlijn Kuipers di Investico. “Pa mas di dies aña caba Hulanda ta tuma tur sorto di medida pa evita cu e paraisonan aki sigui existi”.
“Mi no ta compronde e logica di incentivo aki,” segun Ruud Pruijm, profesor emerito di tecnica administrativo na Erasmus Universiteit Rotterdam. “No ta recomendabel pa haci esaki. Hopi placa ta drenta y sali for di e paraisonan fiscal aki y niun hende no sa unda e ta bay”.
Hoekstra tabata tin un accion na balor di 26.500 euro den Candace Management tempo cu el a drenta pa prome biaha den Eerste Kamer pa CDA. E tempo ey e tabata forma parti di un comision, cu entre otro tabata traha riba proyecto di ley pa contraresta evasion di impuesto. Un siman prome cu Hoekstra a bira minister di Finanza, na october 2017, el a bende su accionnan den e compania y tabata tin un ganashi di 4.800 euro cual el a regala na un instancia caritativo.
Pa loke ta trata e cuarenta personanan cu ta forma parti di e compania aki, tur di nan ta personanan cu posicion halto den e mundo di negoshi. Ta trata entre otro di Maarten Muller (comisario na Van Lanschot Kempen), Alexandra Schaapveld (excomisario di banco estatal FMO) y Joost Kuiper (excomisario na ING). Tom de Swaan, presidente –
comisario di banco estatal ABN Amro ta un nomber cu ta resalta. Nombra door di Hoekstra na 2018 ainda e tin su accionnan den e compania offshore.
