Ta apenas algun siman cu for di Migracion Aruba a sali un keho na Ministerio Publico pa investiga posibel practica dudoso di sea e minister of e ministerio di Glenbert Croes, actual minister di labor, integracion y energia.
Locual ta investigando pa algun siman caba, ta un practica nobo, den cual Ministerio di Integracion den Cocolishi, ta sacando un carta den cual ta duna algun stranhero cu status ilegal, permiso pa por drenta Aruba sin un Visa. Na Migracion a detecta por lo menos un hende muhe, nacionalidad Venezolana, cu a yega Aruba cu e documento aki.
Relaciona cu esaki, a puntra e minister concerni tocante e situacion durante un conferencia di prensa, riba cua el a reacciona bisando cu e no ta un ‘verdachte’ y cu e investigacion aki ta uno necesario pa haya sa e berdad. “Mi kier pa e feitenonderzoek tuma luga, mi ta sostene e feitenonderzoek totalmente, e ta necesario pasobra mi kier pa e berdad ey sali.”
Segun el a splica, tabatin un miho forma pa sincronisa ora cu tur esaki a tuma luga, “lo tabata necesario yama e ministerio puntra, unda nan a yama puntra? Mi ministerio nan no a yama.” Asina el a agrega cu e documento no tabata uno ‘duidelijk’ y cu berdad e tin su firma riba dje, pues nan por a puntra e minister of ‘meld’ esaki na ministerio publico y laga nan check e. “Ban warda e investigacion keda cla y mi ta kere cu e lo trece e luz y claridad riba algo hopi mas grandi cu ta pasando na Aruba”, e minister a bisa, señalando cu tin un problema mucho mas grandi cu mester bay atende cu ne.
Pa un relato mas amplio, lesa bo proximo edicion di TREMPAN.
