Segun parlamentario pa fraccion di AVP, mr. Gerlien Croes, ya for di aña pasa tabatin indicacion cu tabatin un investigacion tumando luga pa locual t’e aspecto financiero na Arubahuis door di Centrale Accountantsdienst y a como fraccion ya a haci un serie di pregunta na minister presidente tocante esaki.
Pa prome, a cuestiona cu con por ta posibel cu tabatin un investigacion andando y cu parlamento no tabata na altura di esaki y tambe kier a haya sa kico ta e motibo pa dicho investigacion.
Segun Croes, tin varios speculacion pa loke ta gastamento di placa na Aruba y tambe indicacion, confirma pa nos minister presidente na maart, cu Aruba a bin ta gasta un promedio di 26 mil florin pa luna gasta na vivienda so pa Arubahuis.
Un otro cuestion cu a bin pa dilanti ta gasto relaciona cu celebracion di Arubadag. Segun e minister plenipotenciario, e investigacion ta uno normal, pero pa sorpresa, ora cu e rapport ta finalisa y entrega na e minister presidente, diripiente e minister plenipotenciario ta retira bisando cu e no ta di contento cu e ‘kindertoelage’ cu e ta ricibiendo desde 2017.
E parlamentario a bisa cu esaki ta un otro forma di “tuma pueblo haci” y asina fraccion di AVP ta haci un peticion pa tene un reunion publico pa minister presidente acudi na parlamento y duna cuenta di kico ta locual a pasa na Arubahuis. “Si no tabatin iregularidad, duna Parlamento di Aruba y pueblo di Aruba e resultado di e onderzoek aki pa e ora ey tur hende sa cu esey no a tuma luga.”
Pa un relato mas detaya, lesa bo proximo edicion di TREMPAN.
