Minister di integracion y labor enfaticamente ta nenga cu na su cas tabatin hende ilegal ta traha. E kiermen cu e noticia ta completamente falso. Ora a confront’e cu prueba cu su mesun rumannan a pidi permiso pa un trahado na cas di su mama, unda el a biba te algun tempo atras, el a nenga di contesta. Tampoco e kier a bay den detaye riba e hecho cu awo e señora ta malo den hospital y su famia no ta para responsabel pa e gastonan na hospital.
Minister Glenbert Croes, cu un tono emocional y rabia, a grita durante un conferencia di prensa cu na su cas no tin ilegal trahando y cu esun cu ta cuida e cas ta su casa. Un biaha pa siman un señora ta yega su cas pa yuda nan, kende ta casa c’un Rubiano di nacionalidad Hulandes y ta legal na Aruba. E mandatario ta para ‘riba cu na su cas e no tin hende ilegal ta traha. El a bisa cu e ta kere cu nan ta custumbra cu e casonan tempo di minister di AVP implica den corupcion (su mesun primo Paul Croes), cu a haya nan cu ilegal na nan cas y tambe den problema di traficacion di hende.
Pero, a purba haci e mandatario varios pregunta riba e tema pero sistematicamente a nenga di contesta nos preguntanan. Mas bien e kier laba su mannan y benta tur cos riba su mama y rumannan, cu de facto, ta esunnan cu a haci e peticion cu DIMAS a nenga pasobra e persona tabatin mas di un aña ilegal na Aruba y cu e tabata trahando. Riba nos pregunta con e “Chief of Staff” di ministerio di labor ta pidi un permiso pa un ilegal y ta neng’e y e persona a sigui traha keto bay na e cas…el a nenga atrobe di contesta, argumentando cu su mama no ta politico y cu no por of no mester cuestiona nada cu su mama of rumannan ta haci.
E noticia ta indign’e pasobra no solamente e ta falso, segun Glenbert Croes. “Mi ta haya cu Patrick Paskel y Nelson Speed Andrade, Enfoke, 24ora ta hungando cu e enfermedad, e dolor di un persona, cu nos a conoce tempo el a traha pa mi mama”, asina el a bisa. Den e contesta ey e mandatario a confirma cu e persona ey a traha pa su mama, siendo ilegal na Aruba, cu de facto ta contra ley y por wordo considera traficacion di hende!
Minister Croes ta considera cu a uza e situacion dje persona aki, pasobra loke e mester awo ta asistencia humano, asistencia medico, pa rason politico. Esey ta e unico motibo dicon nan ta uza e caso aki, pa rason politico y ta totalmente inaceptabel. E hecho cu te awe ni su mama, su rumannan (unda e señora tabata traha de bes en cuando) y ni e mes a saca un florin pa paga hospital y e cuido medico cu e persona mester. Te ainda e señora ta pega na Aruba, hospital entretanto a mand’e cas cu su tripanan afo y cu hopi dolor.
E casa a bisa nos cu na momento cu el a yega studio di 24ora.com, nan a yam’e di Ministerio di Labor pa menas’e pa e no papia nada y si e papia e bisa cu locual 24ora.com a informa ta mentira. Cu si e no haci esey, cu nan lo no yuda su casa. Asina mes, e homber no a sucumbi pa e presion, pasobra e ta kere cu su pareha merece ayudo, sikiera ta humanitario. E tabata bon pa traha pa e famia, pasobra a yuda na cas di mas ruman tambe, pero awo cu el a duna luz cu e no por traha mas, awo a lag’e benta na hospital sin saca un man pa yud’e!
Pa un cobertura mas amplio lesa e edicion di TREMPAN di mañan.
