Minister di labor, Glenbert Croes, ta compromete su mes pa percura pa loke a pasa na Aura Casino entre otro, no ripiti. Esaki tin di haber cu e situacion cu ta reinando na Excelsior Casino.
E mandatario a splica cu tin doñonan cu tabta activo na Aura Casino, cu atrobe ta activo den Excelsior Casino. Mester bay tuma un decision como pais, ki vision ta bay defini loke ta bay ta futuro di casinonan. Si ta kere den operadornan independiente, cu ta asumi nan responsabilidad, ki calidad di operador independiente ta bay permiti na Aruba of si ta bay na responsabilidad, unda cu e doño di e hotel, hunto cu operadornan independiente, mester asumi un responsabilidad den e casino of ta bay ta cu e doño di e hotel, mester ta doño di e casino.
No por ta asina cu e trahadonan ta sali perdedo di tur manera. Tur ora e trahadonan ta sali perdi.
E minister no a reuni solamente cu e sindicato, sino cu tambe e trahadonan di e casino. Gobierno ta atento na loke ta pasando den Excelsior Casino. Si Holiday Inn kier tin e casino como continuidad, ta spera cu di buena fe nan asumi un responsabilidad pa loke ta e trahadonan, nan continuidad di trabao. Gobierno lo tene e doñonan di e casino responsabel pa tur loke nan ta haci. Si nan kier keda Aruba, inverti den otro proyectonan cu a tende cu nan ta inverti, saca placa di casino y hink’e otro caminda, gobierno ta na altura di loke ta e asuntonan interno cu ta tumando luga. Gobierno ta vigilando nan. No por ta asina cu e storia ta bay bolbe ripiti unda cu casino ta bati bancarota, trahadonan ta keda colga y ta perde saco y cangreu. E storia ey ta un capitulo cu kier cera cu e gobierno nobo. Of e doñonan di casino ta asumi su responsbilidad cu e trahadonan of di buena fe ta pidi doñonan di Holiday Inn pa asumi un responsabilidad en bista cu den cuadro di e proyecto cu nan lo kier bay inverti den dje. Un casino ta parti di dje cu nan por mantene e trahadonan na trabao, pa asina nan ningun no perde un trabao.
Imagina cu e trahadonan perde trabao. Imagina cu e storia desastroso di Aura Casino bolbe ripiti. Tin tata cu mama di famia cu tin hopi aña dedica na e trabao, si nan perde trabao. No ta husto.
Como pais, ta inaceptabel y como minister di labor, Glenbert Croes ta haya inaceptabel pa e trahadonan di Excelsior Casino perde nan trabao. Esaki ta un advertencia pa e doñonan actual di Excelsior Casino. E lo ta un bon conseho cu nan lo kier duna e doñonan di Holiday Inn. Tabata tin un tremendo reunion cu mediador y FTA, prome cu e minister a bay afo, unda cu a pidi nan pa apela riba buena fe di e grupo cu ta doño di Holiday Inn pa nan asumi nan responsabilidad den yuda soluciona e problema grandi cu lo bin, si un dado momento tur e trahadonan perde nan trabao. No kier pa ningun di e trahadonan perde nan trabao. Si esun cu kier acepta un pakete di solucion, etc., ya ta bira un otro storia. Pero lo kier pa ningun hende perde nan trabao. Pa Gobierno esey lo ta nan punto di salida. E minister ta kere cu no tin un solucion pa e situacion cu e doñonan actual di Excelsior Casino. Nan no a demostra di tin un bon sentimento pa e trato na e trahadonan. Ta spera si cu por tin un solucion cu e doñonan di Holiday Inn, cu ta hendenan cu gobierno ta responsabilidad, pero lo kier wak nan asumi nan responsabilidad. E minister a splica cu nan ta un gobierno pro trahado, ta un gobierno cu ta defende trahado. Ta un gobierno cu ta yama bon bini na inversion. Kier inversionistanan. Pero den e storia di proyecto y desaroyonan, tur hende mester sali gana. Inversionista y trahado. Y esey ta e solucion cu kier bay busca.
