Por lo general un doño di trabou lo trata na atende cu casonan cu ta implica funcionamento di su compania na prome instancia di un forma interno y sigur lo no busca como prome salida expone publicamente su preocupacionnan y su trahadornan.
Minister di Labor a scohe pa atende cu supuesto problemanan na Departamento di Labor cu un atake frontal. Kico esey ta bisami? Ta obvio cu e ta sinti’e frustra. E minister tin su pleno derecho pa opina si e departamento ta funciona debidamente of no. Esey ta su responsabilidad, pero kico lo por ta e motibo cu ela escohe pa un atake frontal via un conferencia di prensa?
Por ta cu e minister kier a usa e oportunidad aki pa mustra liderasgo, cu e SI ta transparente y mustra cu e SI ta actua cu man duro y cu e no ta ria pa tuma medida. Su actuacion sinembargo tambe por wordo catagorisá como populismo y necesario pa consumo politico local. Por ta cu ela sinti’e den preta door di cu ela wordo atendi door di e partido den oposicion cu ainda no tin nada di un plan social, a sabiendas cu esey tabata den e plan di gobernacion e aspecto mas importante di e gobierno di coalicion.
Por ta cu ela hañ’e confronta cu un problema laboral di un casino na unda atrobe Tata y Mama di famianan lo por perde nan trabou.
Nos por keda busca mas excusa pa su comportacion durante e conferencia di prensa, pero no por ta asina cu e Minister tin pensa di goberna via di prensa. Un gobernante, mescos cu un hefe di un departamento of un doño di trabou ta atende cu problemanan den su departamento/compania di un forma discreto, directo y profesional. Na final di cuenta e unico garantia pa por logra resultadonan positivo ta pa medio di formacion, capasitacion y concientisacion di su trahadornan. Inspira nan pa nan por conhuntamente y como un team ofrece e servicio na e pueblo cu abo como minister ta exigi. Laga e cambionan cu a introduci pa mehoracion di servicio papia pa nan mes. Laga pueblo ripara cu e maneho a nifica un cambio pa mihó y no bay den atake sin mas den prensa, pasobra esey ta muestra di debilidad, di falta di liderasgo y falta di conocemento di e materia concerni.