Despues di negosacionnan interno y su empuhe pa por para pa e clase trahado y pa tur esunnan cu a perde nan entrada debi na e pandemia y e crisis economico cu a bin cu ne, Minister Glenbert Croes a anuncia recientemente prolongacion di FASE pa tres luna mas. Na mes momento, Gobierno a logra pa prolonga subsidio di salario tambe te cu fin di aña.
Mientras tanto Gobierno di Aruba a logra financia 170 miyon florin localmente a traves di emision di bononan. A gradici tur esunnan cu a cumpra e bono, pasobra por a nota cu e interes bou di nos localnan tabata grandi pa e bononan y esaki ta di aprecia.
Ta cu e mesun fondonan aki, awor Gobierno por prolonga FASE, subsidio di salario y e asistencia financiero na empresanan mediano y chikito. E facilidadnan aki na sector priva, ta wordo prolonga cu 3 luna, te cu december.
Pues tur esunnan cu ta depende di FASE y di subsidio di salario por ta trankil, pasobra esakinan ta wordo prolonga te fin di aña. Mescos ta conta pa e sosten di 4000 florin pa cuartal pa empresanan mediano y chikito. Danki na e colaboracion di Minister di Finansas y Minister di Asuntonan Social, ta logra trece trankilidad den comunidad pa e lunanan nos dilanti, mientras ta traha pa e economia pick up bek.
