Sea ta su decision of no, pero ta bou su maneho cu prijs di gasolin ta baha pa dos luna consecutivo. Mescos ora e subi ta “pa culpa” di e minister, ora e baha tambe, den cierto forma, mester elogia e mandatario na mando y cu bou su maneho ta anuncia rebaho. Tur cos ta mustra cu e siman aki tarifa di gasolin lo baha cu 7.5 cen pa liter y diesel lo baha cu 6.5 cen pa cada liter. Sigur un bon noticia!
Manera ta conoci, riba tur di dos diaranson di luna, ta adapta tarifa di gasolin, diesel y kerosin. Como tal, otro siman dia 11 di januari lo anuncia e cambio di tarifa cu ta drenta na vigor dia 12 di januari 2022. Sinembargo, fuentenan cerca di e decision a sigura na nos cu ya por papia di un bon reduccion cu lo sigui vigente durante henter luna di januati te na e di dos diamars di februari, ora atrobe nan lo anuncia e cambionan cu lo drenta na vigor su mañan.
Ta bon pa accentua cu prijs di combustibel ta regla a base di e prijs internacional y no tin nada di haber cu Gobierno di Aruba. Pero, e mesun politiconan, depende na cua banda nan ta sinta den parlamento, ta acusa esun na mando di ta responsabel pa e prijs. Pero, por sinti cu awo cu nan ta sinta na e banda di gobernacion, diripiente si ta tarifa internacional pero prome cu esey tabata tarifa impone door di e minister di e tempo ey. Pa colmo, asina cu MEP a perde e cartera di economia, diripiente prijs di gasolin a cuminsa baha tur luna, sea ta pa suerte of pasobra internacionalmente demanda a subi atrobe pa combustibel.
Tipo di cambionan di prijs asina tin un efecto directo den nos economia, specialmente pa esunnan cu ta uza hopi combustibel den nan trabou. Mester imagina taxistanan, chauffeurnan di autobus, nos compania nacional di bus, companianan priva di transporte via bus y autonan luhoso y asina por sigui menciona. Ki ora e tarifa subi, nan ta sintie den nan gastonan di operacion, siendo cu di nan banda si no por ahusta nan tarifanan pasobra hopi di nan, specialmente taxi, bus y autobus, ta mara na un prijs maximo ancra den ley.
