Despues di a papia cu tur persona, comerciante, chikito y grandi, cu kier a comparti nan pensamento, vision, deseo y preocupacion pa futuro di Caya Betico F. Croes y centro di Oranjestad, a yega na e conclusion cu centro di ciudad mester bira un centro di vivienda y gastronomia.
Fase uno lo cuminsa den e area di Columbustraat y Wilhelminastraat, cual lo ricibi un inversion publico cu lo trece cambionan infrastructural pa embeyece e area, hacie mas accesibel pa personanan cu limitacion, y inclui mas mata pa brinda mas fresco y comfortabilidad den e area publico aki, y den centro di ciudad.
Tambe lo instala mas iluminacion di e area, y crea mas terasa y areanan di recreacion. Asina ‘ki lo subi e sentido di siguridad, y duna sosten na e inversionnan di sector priva cu ya caba a haci den e area. Conhuntamente cu sector priva ta busca pa crea e maximo impacto cu e poco fondo publico cu tin disponibel.
Proximamente lo inicia cu e procedura pa reconoce Oranjestad como un “Capital Culinario”, bou di e programa internacional “World Food Travel Association” y pa asina cu tempo logra e maximo titulo otorga pa e programa internacional “UNESCO City of Gastronomy”. E titulo aki lo por pone Oranjestad riba mapa internacional, y atrae asina clientela nobo y exclusivo pa nos isla.
Fase Uno di Revitalisacion di Oranjestad ta solamente un inicio. Ya pa un tempo caba ta trahando ariba e otro proyectonan tambe cu ainda falta pa anuncia. Minister Geoffrey Wever kier manda un señal concreto y demostra cu Gobierno di Aruba kier ta partner cu sector priva den desaroyo.
Crea vivienda den nos centro di ciudad ta un elemento importante pa logra revitalisacion di Oranjestad. Pa por duna contenido na e vision aki a haci e ehercicionan necesario pa por presenta proyectonan realistico di tal magnitud cu ta desemboca den un subida significante di hende den nos centro di ciudad. “Ora tin hende ta biba den centro di ciudad e ta crea fluho di hende constante cu lo ta clientela pa e comerciante nan den centro di ciudad”, minister Wever ta subraya.
