“A tuma nota cu señora drs. Marisol Lopez Tromp a skirbi cu Minister di Asuntonan Economico, Comunicacion y Desaroyo Sostenibel a biaha sin informa Parlamento. E informacion aki ta incorecto”, asina Minister Geoffrey Wever a corigi riba su pagina di Facebook. Esaki despues cu awe for di Parlamento a sali critica cu no a informa nan di e biahamento di tanto Ursell Arends ni Geoffrey Wever pa exterior, tampoco e motibo di nan biahe.
E mandatario a sigui bisa cu “Prome cu mi a sali di biahe mi a manda un carta pa Presidente di Parlamento informando cu mi lo ta uitlandig y cu mi ta disponibel via email of telefoon”, asina e mandatario a aclaria. Mas leu Wever a enfatisa cu “hiba oposicion ta nifica informa pueblo corectamente, locual señora Lopez Tromp no a haci den e caso aki”.
Di otro banda, parlamentario Marisol Lopez-Tromp a pone e carta cu Secretario di Conseho di Minister a manda pa Gobernador y pa Parlamento pa informa di e biahe di Minister Presidente. El a manda e carta riba e pagina di facebook di Minister Geoffrey Wever pa e uza esey como ehempel dia cu e biaha atrobe.
“Cu un carta asina aki un Minister di un pais ta notifica Gobernador di Aruba por medio di e secretaris di Conseho di Minister cu e lo ta den exterior, sea pa trabou of pa biahe priva of vacacion y mencionando e pais caminda e lo ta. Alabes Minpres, Minister plenipotenciario, Buitenlandse Betrekkingen, MinBZ y Parlamento di Aruba mester a wordu notifica di e ausencia di Minister Wever.
“Bo persona no ta den bo bufete mas caminda abo por djis email bo colega. Vice Prome Minister Ursell Arends a notifica cu un portret via Facebook riba Empire State Building cu e no tey. Dialuna tabata huramentacion y awe ya RAIZ tin un break? Minister di Economia no tin un reaccion riba e consequencianan di e di 7 tranche di placa pa Aruba cu Hulanda a para??”, esey e lider di fraccion di MAS kier sa.
