Minister Geoffrey Wever ta informa cu e “Macutu di Compras” pronto lo contene mas observacion di prijs di mas producto y di mas supermercado. Meta di e “Macutu di Compras” ta pa e consumidornan por compara e prijsnan di algun producto popular den supermercadonan di Aruba.
E “Macutu di Compras” ta un lista di prijs di cierto producto cu e supermercadonan ta ofrece. E supermercadonan mes ta pone e prijs. Actualmente e observacion di prijs ta tuma luga den dies supermercado y pa 25 producto. Departamento di Asuntonan Economico, Industria y Comercio (DEACI) ta observa e prijsnan, compila y publica cada dos siman e “Macutu di Compras”.
Gobierno ta consciente cu costo di bida ta halto y pa brinda apoyo pa cumpra mas eficiente lo amplia e lista cu mas observacion di prijs den 25 supermercado y pa 50 producto. Entrante fin di augustus e “Macutu di Compras” ta contene mas observacion di prijs di e productonan.
E ampliacion di e lista cu mas supermercado y producto tin como meta pa brinda tur consumidor e posibilidad di por compara cua producto ta mas barata y na cua supermercado y asina cumpra mas consciente.
Minister Geoffrey Wever ta invita tur consumidor pa haci uzo di e “Macutu di Compras” pa compara e prijsnan di 50 producto den 25 supermercado den tur districto di Aruba y asina wak na cua supermercado e producto ta mas barata. Un palabra di danki na DEACI pa e trabao continuo pa facilita e “Macutu di Compras” pa nos consumidornan.
E “Macuto di Compras” ta obtenibel riba e website www.deaci.aw y riba e pagina di Facebook di DEACI.
