Diaranson mainta, Minister di Husticia, mr. drs. Arthur Dowers, a haci un bishita di inspeccion na Aeropuerto Internacional Reina Beatrix, pa mira e progreso di e proyecto Gateway 2030, cu ta e expansion y modernisacion di infrastructura di nos aeropuerto. Segun e planificacion actual, ta proyecta pa e facilidadnan nobo habri dia 15 di december proximo.
E bishita tabatin un enfoke particular riba e aspectonan di siguridad di frontera, control migratorio y e importancia di garantisa cu e infrastructura nobo ta ofrece e condicionnan necesario pa e diferente instancianan responsabel pa siguridad y control na nos aeropuerto.
Cu e desaroyo di Gateway 2030, Aruba ta prepara su infrastructura na aeropuerto pa atende un fluho mas grandi di pasaheronan den futuro. E crecemento aki ta trece cu ne no solamente e necesidad pa mas capacidad na aeropuerto, sino tambe pa sistemanan moderno y eficiente di control migratorio y siguridad, cu por atende e demanda creciente sin compromete e calidad y efectividad di control di frontera.
Modernisacion di aeropuerto no ta solamente ampliacion di infrastructura y capacidad pa maneha mas turismo. Un aumento den cantidad di pasahero ta pone exigencianan adicional riba e instancianan encarga cu control di entrada y salida di nos pais. Pesey, ta esencial pa e infrastructura, procedimentonan y sistemanan di siguridad ta prepara pa atende e fluho aki di manera ordena, eficiente y sigur.
Den e contexto aki, ta importante pa e infrastructura nobo tene cuenta cu e necesidadnan operacional di Immigracion, Grens Politie y demas instancianan cu tin responsabilidad den control y proteccion di nos frontera. E distribucion di facilidadnan, fluho di pasahero y coordinacion entre e diferente autoridadnan ta aspectonan importante pa garantisa un funcionamento efectivo di e sistema di control.
Un fluho mas grandi di pasahero ta exigi tambe un enfoke moderno den cual infrastructura fisico, tecnologia y procesonan operacional ta complementa otro. E meta ta pa facilita un proceso di entrada y salida mas eficiente, mientras e autoridadnan competente ta mantene e capacidad necesario pa ehecuta nan tareanan di control, identificacion y supervision.
Minister Dowers ta enfatisa importancia di cooperacion structural entre e diferente instancianan involucra, pa asina garantisa cu modernisacion di aeropuerto ta cana man den man cu e exigencianan actual y futuro di siguridad di frontera.
E enfoke ta uno integral, den cual eficiencia di operacionnan di Aeropuerto Internacional Reina Beatrix, control efectivo di frontera y siguridad di pasaheronan y personal ta central. E desaroyo di Gateway 2030 mester contribui na un aeropuerto cu no solamente por procesa mas pasaheronan, sino cu ta dispone tambe di e infrastructura y sistemanan necesario pa mantene un control adecua riba entrada y salida di personanan.
E bishita di inspeccion di awe mainta ta forma parti di e atencion cu Minister Dowers ta duna na desaroyonan cu tin impacto directo riba siguridad nacional, proteccion di nos frontera y e funcionamento di instancianan cu ta cay bao di responsabilidad di e mandatario di husticia.
