Fuera cu tin hopi oferta di trabou y demanda pa trahado, segun Minister Dangui Oduber, cifranan di e region ta mustra cu e prosperidad di turismo na Aruba ta miho comparti cu na otro destinonan. Esey ta loke e mandatario a duna di conoce dialuna mainta durante conferencia di prensa di Gabinete Wever-Croes II.
“Mi ta kere bo ta mira e prosperidad pasobra ora turismo ta bay bon, tur hende ta prospera. Tin empleo, tin pa riba mesa,” esey Oduber a comenta haciendo un comparacion cu e situacionnan ora cu mester a cera frontera pa motibo di pandemia, cu aworaki cu economia continuamente ta progresa. A menciona, por ehempel, con hotelnan tin dificultad pa haya persona pa traha, pero tambe a indica riba e estudionan cu Aruba Tourism Authority ta haci riba e sentimento di nos comunidad riba con e prosperidad ta comparti.
Si ta compara e resultado di e estudio ey cu esunnan den region, por saca afo cu e prosperidad ta miho comparti na nos isla cu na Republica Dominicana, Mexico, Barbados of Bahamas. “Aruba ta bendiciona di ta un pais hopi desaroya den compara cu e otro competidornan,” asina e titular di turismo a finalisa bisando.
