Minister Dangui Oduber: Ta habri frontera cu Merca cu hopi optimismo

1214

Aruba ta pasando den momento hopi dificil, es mas e momentonan mas dificil di historia di nos pais. Nos ta Arubianonan orguyoso y trahado y semper nos a demostra cu nos por bounce back di tur crisis cu nos a pasa aden. Nos pais ta para na e reto mas grandi den nos historia y nos tin tuma e reto aki y sali for di e crisis aki.

Dia 13 maart 2020 Covid-19 a yega Aruba y consecuentemente nos mester a sera nos fronteranan. Nos fronteranan a keda cera pa mas cu 3 luna y tur hende riba e pais aki por a sinti kico tawata e consecuencianan. Nos a pone salud di nos hendenan na prome luga y nos ta keda haci esaki.

Ta importante pa menciona cu no ta un decision facil pa habri nos fronteranan bek. Mester pone den balans, salud di nos hendenan y tambe economia di nos pais. Nos ta sinti cu nos a prepara nos mes debidamente como pais pa por habri nos fronteranan bek. Nos a tuma tur e medidanan di prevencion necesario pa limita e riesgo di importacion di casonan nobo mas tanto posibel.

“Nos a pone testing obligatorio pa hotzones na Merca y tambe lo test tur pasahero ora nan yega Aruba. Esaki ta un medidanan adicional cu nos a introduci pa Merca”, asina Minister Dangui Oduber a vocifera.

Aruba ta hopi bon prepara

“Mi tin cu gradici Ministerio Turismo, Salud Publico y Deporte, DVG, ATA, Directie Luchtvaart, AAA, AHATA, Ministerio di Husticia, IASA y Migracion, Crisis Team pa tur esfuerzo pa nos por a yega aki nan. E no tawata facil pa haci tur e trabounan pa nos ta miho prepara posibel pa limita e riesgo di importacion. Pa simanan largo preparacionnan ta andando y finalmente nos a yega na e momento aki cu nos ta habri nos fronteranan bek pa Merca”, asina Minister Dangui Oduber a bisa. E ultimo dianan aki personal di DVG ta na airport pa vigila y monitoria e situacion den practica y e ta bayendo bon.

“Cu hopi optimismo y positivismo nos ta mira e reapertura di nos fronteranan bek cu Merca. Turismo ta e driver principal di nos economia y ban ta agradecido cu pocopoco nos por cuminsa reactiva nos turismo bek. Nos ta yama bonbini na tut nos bishitantenan awe. Nan tambe ta tuma e risico pa bin disfruta na Aruba”.

Ta keda pidi pueblo cooperacion pa cuida nan mes, tene nan mes na e protocolnan, keda laba man frecuentemente y keda mantene distancia. Hunto so nos por logra bolbe bek riba nos pianan.