Minister di Salubridad Publico Dangui Oduber den un declaracion manda ta bisa di a tuma nota di e articulo cu a ser publica den columna di Sr Van der Zee den e matutino Amigoe.
Na mes momento el a tuma contact cu e kroonleden di Gobierno den e Hunta di Supervision di hospital y tambe ta den contacto cu e otro miembronan tambe. E ta bisa cu loke a keda publica cu sucedido den laboratorio di hospital, ta acusacionnan hopi serio cu ta ser haci y “como minister encarga cu salud nos ta tuma esaki tambe na serio y ta maneha esaki cu cautela.”
E ta un acusacion di fraude, e ta bisa, y segun e articulo, ta duna informacion tambe con e fraude lo ta tumando luga. “Nos ta papiando di testnan delicado cu ta wordo haci pa salud di hende y cu esaki no tin espacio pa haci fraude y tipo di cosnan cu ta wordo insinua. Pami como Minister Salud,loke a wordo treci dilanti ta algo cu ta nobo den sentido nunca mi a wordo informa di posibel caso di fraude aki na laboratorio di hospital door di ni e Hunta di Supervision di hospital ni door di e Raad van Bestuur di hospital.”
E mandatario a sigura cu si e tawata na altura, e lo a tuma e accionnan necesario. Den e caso specifico aki ta bay manda un carta pa e Hunta di Supervision di HOH pa laga un partido independiente haci un investigacion forensico inmediatamente. A raiz di e resultado di e investigacion forensico lo determina si mester entrega un keho pa un investigacion penal na Ministerio Publico p’asina esnan responsabel di e posibel fraude wordo persigui. Su Ministerio lo pone Ministerio Publico na altura tambe! Pa finalisa e mandatario a bisa cu “nos ta exigi un contesta di parti gerencia di hospital y nos kier claridad y transparencia den e caso aki! E situacion cu a surgi aki lo mester tin consecuencianan hopi serio si resulta cu loke ta ser bisa por wordo prueba!”
