Geschillenregeling ta un tempo cu ta riba agenda di IPKO tur aña. Pero tambe e agenda di reunion entre e paisnan di Caribe Hulandes. A papia cu ta yegando na un acuerdo. Sinembargo Parlamentario Ryçond Santos do Nascimento riba e tema aki ta pensa diferente.
“E geschillenregeling ta trata di algo mas cu simplemente yega na un ley pa soluciona problema y conflicto entre Hulanda, Aruba, Corsou y Sint Maarten.”
E ta kere cu mester keda vocifera e pensamento cu cada un di e paisnan Hulandes den Caribe ta un pueblo apart. “Mester corda cu como pueblo nos tin e derecho di autodeterminacion. Esey ta e diferencia grandi entre un municipio na Hulanda, cu Corsou, Aruba y Sint Maarten.”
E ta sinti cu si no sigui menciona e tema aki na final, lo mira e paisnan aki como simpel municipionan di Hulanda. Of manera e islanan BES. Mester keda papia di e problemanan den Reino. “Niun momento mi a bisa cu Hulanda ta perfecto y cu nan no tin problema. Si bo ta un ambtenaar na Den Haag cu tin e idea cu bo sa miho y por interveni, ta logico cu nan ta pensa asina pasobra si ta den un organisacion di BZK cu tin 10 mil ambtenaar, bo ta cuminsa pensa cu berdad bo ta doño di mundo.” P’esey mester keda skerpi.
E ta kere cu por saca hopi mas di un relacion cu Hulanda, pero ta importante cu e islanan aki tin un bos propio. Pasobra esunnan cu ta biba aki banda, sa kico e problemanan ta na cas. Pero mester “divorcia” for di e problema mas grandi na Aruba, cu ta AVP y MEP cu ta esunnan responsabel p’e problema financiero debi cu nan a goberna durante 37 aña largo.
“No lubida esey y for di e punto di bista ey Hulanda ta un aliado importante pa pone Aruba riba un bon direccion.”
