Minister di Turismo, Transporte y Labor, mr. Wendrick Cicilia, ta anuncia cu orguyo cu dia 7 di september a firma un acuerdo entre Departamento di Aviacion Civil di Aruba (DCA-A) y Autoridad di Aviacion Civil di Republica di San Marino (SM-CAA). E acuerdo ta representa un paso importante den e compromiso continuo di Aruba pa mantene e normanan internacional di siguridad di mas halto den aviacion y pa fortalece su posicion como un centro confiabel pa operacionnan internacional di aviacion.
E acuerdo cu a firma ta crea e posibilidad cu avionnan registra na Republica di San Marino por opera comercialmente bou di un Air Operator Certificate (AOC) emiti pa Departamento di Aviacion Civil di Aruba. Esaki ta amplia e posibilidadnan pa operadornan cu un AOC di Aruba pa uza avionnan registra na San Marino, manteniendo supervision regulatorio efectivo y e standard di siguridad di mas halto. E acuerdo ta confirma tambe cu no tin ningun transferencia di funcionnan of responsabilidatnan regulatorio entre e dos autoridadnan.
Riba 15 di mei 2026, Aruba y San Marino ya a firma un acuerdo cu ta permiti avionnan registra na Aruba opera bou di un AOC di San Marino. Hunto, e dos acuerdonan ta crea un marco completo pa facilita operacionnan entre e dos registronan di avion, mientras cu ta garantisa cu e responsabilidadnan di supervision regulatorio ta keda claramente defini pa cada autoridad competente.
Ambos acuerdo ta conforme cu Articulo 83 di e Convenio di Chicago di 1944 di e Organisacion Internacional di Aviacion Civil (ICAO), cu ta permiti estadonan contratante haci areglonan di cooperacion pa fortalece supervision di siguridad den aviacion internacional.
Minister Wendrick Cicilia a declara enfatisa cu: “Siguridad den aviacion ta sigui ta un di e prioridadnan mas halto di e Gobierno di Aruba. E acuerdo aki ta confirma nos compromiso cu cooperacion internacional y excelencia regulatorio. Door di fortalece nos colaboracion cu San Marino, Aruba ta amplia su capacidad pa sirbi operadornan internacional den un manera responsabel, mientras cu nos ta mantene cumplimiento estricto cu e standardnan di ICAO y ta fortalece e reputacion internacional di nos sector di aviacion civil.”
Bou di e acuerdo, e dos autoridadnan lo coordina y coopera estrechamente den actividadnan di supervision di siguridad, tene reunionnan tecnico regularmente pa discuti asuntonan operacional y di aeronavegabilidad, intercambia informacion proveniente di inspeccionnan y auditorianan, facilita inspeccionnan na sitio y mantene puntonan oficial di contacto pa garantisa un comunicacion eficiente entre ambos autoridad.
E acuerdo ta valido pa un periodo inicial di tres aña, cu posibilidad di renobacion door di mutuo acuerdo.
Minister Cicilia a conclui cu e firma di e acuerdo ta refleha e vision di e Gobierno di Aruba pa sigui inverti den un sistema di aviacion civil moderno, sigur y respeta internacionalmente, fortaleciendo conectividad internacional, oportunidadnan economico y e posicion di Aruba como un socio confiabel den aviacion mundial.
