For di momento cu Minister Oduber a manda yama un reunion di Parlamento pa atende e proyecto di Green Corridor, esaki tabata mustra sospechoso, sigur mirando e maneho y ehecucion cu a ser hiba pa gabinete Mike Eman II cu e tremendo proyecto aki.
Lider di fraccion di AVP, sr Marlon Sneek a mustra cu henter e proceso aki tabata uno cu a mustra mas bien un intento di Minister Oduber pa hala atencion pa su persona, y trata di saca probecho politico.
“Si nos mira e punto pa cual a yama e reunion aki, tabata pa trata un carta cu e Minister kier a discuti cu Parlamento pero pa sorpresa di tur hende ora cu e reunion a inicia, Minister a pone centenares di documento pa miembronan di Parlamento por mira y studia, tur esaki den un lapso di algun minuut of ora.
Tabata bisto for di momento cu Minister Oduber a cuminsa den su disertacion cu ta trata aki di un wega politico, buscando pa hala atencion politico pa su persona y hungando un wega cu claramente e mes no tin nocion di kico e kier haci.
Na final di dia fraccion di e gobierno di coalicion a duna Minister Oduber un mandato cu ya caba e tabatin pa medio di un “Landsverdordening” cual a ser duna na e Minister di Infrastructura na 2010, esta Benny Sevinger, cu ainda ta na vigor.
Pues e mocion cu fracion di MEP a sostene y duna Minister Oduber, no tin balor algun ya cu e Landsverordening ta esun cu ta riba e mocion aki aproba pa e fraccion tricolor den Parlamento.
Di con Minister Oduber a bin busca e mandato aki no ta conoci pero algo cu pueblo si por tuma nota di dje, ta aki ta papia un Minister cu e mes a bruha cantidad di cos den otro ya cu mientras cu e ta papia di un desaster, di un crisis, Minister Oduber mes ta papia cu e proyecto pa 99% ta cla ehecuta caba y falta solamente 1% pa wordo completa.
Tin un carta cu en berdad a wordo compila pa DOW riba e proyecto y su estado fisico di ehecucion, pero ta algo cu ex Minister Sevinger mes a pidi pa esaki y cu ta mustra riba cosnan cu falta manera borchi di trafico, strepi blando riba caminda, cierto areanan caminda a laga sushi di construccion acumula y otro detayenan cu e compania tin cu cumpli cu nan.
Awor Minister Oduber kier uza como arma politico c’un proyecto asina importante manera e Green Corridor aki,” lider di fraccion, Marlons Sneek a mustra.
