Cuatro Ministerio a coopera pa pone e fondonan disponibel pa ehecuta e diferente fasenan di e Proyecto di Camara di Siguridad. Un di nan ta Ministerio di Naturaleza pa cual e mandatario encarga, Ursell Arends, tambe tabata presente durante un conferencia di prensa yama door di SETAR pa informa di nan participacion den esaki.
“Nos ta kere cu e inicio aki pa transforma e centro di ciudad for di un area caotico pa un maneho controla di parkeo, cu e vision pa trece ordo, regulacion y movibilidad den centro di ciudad, ta cay bon cu e Proyecto di Cameranan.”
E mandatario a expresa cu instalacion di cameranan di siguridad den y rond di centro di ciudad ta yuda aumenta siguridad di tur ciudadanonan cu ta haci uzo di e sistema di parkeo den centro. Esaki ta e motibo cu na momento cu Minister di Husticia, Rocco Tjon, a acerca su persona pa presenta e plan aki, a mustra disponilidad pa participa di biaha den e Proyecto.
A pone fondonan disponibel pasobra e ta beneficia no solamente localnan pero tambe e turistanan cu ta haci uzo di centro di ciudad completo.
El a gradici tur e companianan estatal cu ta coopera cu Gobierno pasobra “den union nos por logra cosnan positivo pa nos pais”. Y a sigura cu ya caba a papia cu Minister Tjon riba e posibilidad pa den e proximo lunanan amplia e proyecto pa otro areanan di importancia, cu ayudo di otro Ministerionan pa coopera cu e fondonan necesario.
