Durante conferencia di prensa di gobierno e pregunta a bin padilanti riba e forma di laga hende den libertad. Segun minister Andin Bikker, awor aki un persona cu si e wordo deteni, of wordo condena, e ta sinta ⅔ parti di su castigo.
Los di esey, tin un articulo 37, cual e gobierno anterior a introduci na 2014, cu ta bisa ora cu ora cu KIA ta sobrepopula, esun cu ta mas cerca di haya su libertad, irespecto ki crimen el a comete, ta bin na remarca e ora pa wordo libera.
Actualmente na Hulanda nan no kier ni laga e ⅔ parti. Si ta cierto crimennan, nan mester sinta full e castigo, cual e minister ta di acuerdo cu esaki.
E dilema ta, cu tin hopi deseo y mester tin fondo tambe. E debate cu tin cu hiba ta, ta con ta bay haci. Si kier sigui e mesun rumbo na Hulanda, con ta bay tin suficiente espacio pa por detene e hende aki. Den e cuadro eynan mester bay wak un rato.
E minister a menciona cu pa e siman aki, ta trahando rapidamente riba cambio riba articulo 37 y tambe lo bay inventarisa su efectonan presupuestario. Tin crimennan entre otro esunnan di pedofilia, aunke cu nan por wordo cera pa bida, pero, mester tin luga pa cera nan. Nos sistema awor aki ta hinca den otro, cu no obstante e crimen, nan ta sinta ⅔ parti, a menos cu haya bida largo y tambe si KIA ta sobrepopula, articulo 37 ta wordo ehecuta, cual no ta haci distincion di e tipo di crimen.
Ta haya e discusion tambe, dicon tal crimen si y dicon e atracador no. Esaki ta un debate cu por bira hopi dificil, cual e minister ta admiti. Sinembargo, ta un debate cu mester hiba. Na fin di dia, e cuponan den KIA ta limita. KIA no a haya mantencion pa hopi aña. Rapportnan a yega algun siman pasa, cu ta bisa cu mester haci cierto mehoracionnan, pasobra si otro aña nan bin bek y e evaluacion lo ta menos positivo. Ta un discusion cu mester a hiba den comunidad, mirando cu e por tin efectonan presupuestario. Tin cu bay wak con por bay financia un facilidad di detencion nobo of renoba esun actual.
A mustra minister Andin Bikker cu den comunidad tin expresion culpando minister di a firma pa e persona bay liber.
Den e caso specifico aki cu un pedofil a sali liber, esaki tabata un falta di comunicacion interno. Loke tabata poni, no ta pone zedendelicten. No a identifica esey. E minister a pidi pa mas informacion y mester bin un paro na articulo 37 y no kier tende di laga hende den libertad, irespecto e crimen cu nan a comete.
E minister ta pensa cu mescos cu corte y ministerio publico ta esunnan cu ta duna conseho riba gratieverzoeken of riba si ta bay laga hende bay un tiki mas tempran ora cu nan crimen of KIA ta sobrepopula, tambe ta e instancianan aki mester tuma e decision.
Consehonan
E consehonan ta bin di Ministerio Publico, pero e minister mester firma e documentonan aki. Semper bo ta bay evalua riba e geschokte rechtsorde. Si un persona fresco fresco ayera tardi a comete un atraco y no tin caminda di pon’e y tin un persona cu e tin paar di siman di yega su castigo cu e por sali liber, e ora eynan e evaluacion ta, kico e geschokte rechtsorde ta pidi. Si laga e persona eynan cu a caba di comete un atraco bay, e persona cu tin pa bay reintegra, pa malo cu e tabata, pa e crimen cu el a comete, dado momento, un luna prome of despues, e ta bay drenta comunidad bek. Esey ta e decision fastioso cu tin cu tuma. E minister ta asumi su responsabilidad riba e caso specifico aki y a pidi comunidad disculpa. Na final di dia, e ta keda responsabel como minister encarga. E manera tambe ta cu ora cu e minister señala cu algo a bay fout, mesora ta bin cu recomendacion y accionnan concreto.
Na fin di dia, tur e polemica aki ta, pasobra KIA ta sobrepopula y den 8 aña largo, e gobierno anterior no a haci nada pa renoba y amplia KIA. Esey ta pone cu ora mester tin caminda pa hinca e personanan aki. E ora mester bay over na crea cuponan nobo den prizon.
