Milton Ponson, Rainbow Warriors Core Foundation miho conoci como Resilient Worlds International ta trece dilanti su opinion riba e tema di energia, particularmente e planta di produccion di energia cu ta WEB Aruba N.V. y su funcionamento y e maneho actual cu ta tumando luga. Esaki ta den contexto di e tres black out cu a tuma luga, cuater si kier ta exacto, na maart, na juni y ultimamente ayera; dos biaha den un solo dia.
Ponson ta bisa: “Nos tin cu bay bek un rato den tempo pa delinea algun cos cu a wordo haci den e cuadro di maneho tecnico di WEB Aruba N.V. A tuma e decision basta aña pasa pa pocopoco cuminsa reemplasa e gas turbine cu ta traha cu steam na WEB cu dual fuel engines cu por traha sea cu heavy fuel oil/bunker oil of cu gas pa genera electricidad; e asina yama RECIP engines di e compania Finlandes Wartsila.
E pregunta ta si tur esaki ta debidamente planifica, dicon aworaki tin tanto kinderziektes? Si nos bay wak un rato kico exactamente ta encera e suministro di seis planta di RECIP supuestamente, y segun e propio comunicado di prensa di e compania Wartsila na Finlandia, e instalacion di e plantanan aki mester a keda cla, suministra, instala, getest y entrega turn key na 2020.
Nos tur sa cu covid-19 a causa un retraso den hopi proceso y nos ta wak aworaki cu anno 2022, supuestamente aworaki e sistemanan ta biniendo online. Pero si nos ta wak cu ayera e gerente, e CEO, director di WEB ta indica cu ta un di e mashinnan aki di RECIP Wartsila a causa tur tres black out y tecnicamente tur cuater black out, nos tin cu puntra nos mes: Con a para cu e instalacion tecnico? Con por ta posibel cu un black out ta tuma luga marduga y ta tuma luga oranan pa determina e fayo cu a conduci na e sistema completo trip y causa un black out total y pa colmo dos biaha sigui den menos di shete ora na Aruba?
