Diahuebs anochi pa 11:00pm a sosode un accidente banda di Quinta del Carmen Restaurant na Bubali. Tanto Polis como tambe Ambulance a presenta na e sitio pa brinda asistencia. A topa un auto marca Lincoln modelo MKZ y un auto marca Nissan modelo March, ambos tabata kibra. Un pasahero den e Nissan March a resulta herida pa cual Ambulance a hib’e Hospital pa ricibi tratamento medico.
Testigonan a bisa Polis cu e Lincoln a sali full speed for di e parkinglot di Quinta del Carmen Restaurant y subi Caya Imelda Catharina Eckmeyer-Bermudez sin tene cuenta cu e Nissan March tabata bin di pabou. E auto marca Lincoln a dal den e Nissan, pone zwaai y bira e Nissan como 90 grado.
Debi cu esunnan den e Lincoln MKZ tabata militar, a pidi presencia mesora di Koninklijke Marechaussee pa bin na e sitio. Den casonan asina Polis ta atende cu e civil y e Polisnan Militar ta atende cu nan coleganan Militar.
