Den careda di 4:28 pm e avioneta N51832, cu ta un avion civil, a sali di Corsou rumbo pa Aruba. E capitan dje avioneta a baha e avioneta pa 5:10 pm, el a haci esey durante su di tres intento.
E avion civil lo a haya permiso di DCA pa por a baha riba e pista di Palo Marga. Na sitio tur departamento concerni tabata presente pa cualkier incidente cu por a pasa. Despues cu e capitan a logra baha e avioneta, di biaha tur esunnan presente a acerca pa mira cu tur cos tabata na ordo.
Piloto dje avioneta ta Hubert Hart, kende ta biba na Corsou, y tin famia aki na Aruba. Ta haciendo un training di evacuacion medico y parti di esey ta baha na Aruba. E bahamento dje avioneta no tabata un sorpresa, ya cu autoridad envolvi tabata na altura di esaki.
Despues cu a baha y tur departamento concerni a dobel check cu tur cos tabata na ordo, Hart a lanta vuelo di Palo Marga y bay aeropuerto pa haci un ‘low pas landing’, unda a touch pista y bek pa Corsou. Esaki tabata tin di haber cu un training pa locual ta trata evacuacion medico na momento di calamidad of emergencia grandi.
