Mario Arends di Aruba Tourism Authority cu orguyo a anuncia cu awe diaranson tabata un dia druk na waf di Playa. E bishitantenan di crucero ta circulando riba gran parti di nos isla. Ta conta cu e barco Freedom of the Seas, cu ta conta cu mas di 4500 pasahero. Tambe tin Rotterdam di Holland American Line, cu ta carga mas of menos 1400 pasahero.
Tin tambe Monarch di Pullmantur, cu ta carga mas of menos 2750 pasahero y por ultimo tin Starbreeze tambe cu ta carga 200 pasahero. Si conta bon, ta calcula mas of menos 8850 pasahero pa e dia di awe.
Tambe tin un barco cu a keda for di diamars, cu ta Windstar. El a overnight, debi na un reparacion cu nan mester a haci. Nos ta den high season. December ta un luna sigur pa e industria di crucero.
Mario Arends a splica cu lo tin otro dianan tambe cu ta bay ta mas of menos mesun druk y sigur mas druk. Loke ta mira hopi ultimo tempo ta e barconan mas grandi. Freedom of the Seas ta cay sigur den categorianan di barco mas grandi. E ta un mescla di barco chikito, barco mediano y barco grandi. Lo bay tin dianan mas druk, specialmente ora tin mas barco grandi.
Crecemento
Pa loke ta aporte di e turista, Mario Arends a splica cu recientemente na October a haya un rapport di un instituto internacional cu ta haci sondeo riba diferente isla pa loke ta industria di crucero. Aruba ta inclui den e sondeo aki. A mira cu desde e ultimo rapport, e averahe cu cada turista crucero ta laga den nos economia, a subi cu 8.8%. Esey sigur ta duna indicacion cu e strategianan cu ta encamina, ta dunando su frutonan. Esey ta un parti importante den e strategia. Sigui enfoca riba subi e averahe di gasto di e turistanan crucero y asina por mehora e impacto cu e industria tin riba nos economia. Sigur di un otro banda, e volumen, esta e cantidad di pasahero tambe ta importante. E aña aki lo bay mira cu atrobe lo bay mehora e cantidad cu nos ta haya den un aña.
Aña pasa a yega un tiki mas cu 792mil pasahero, cual tabata e miho aña te na e fecha. Y na 2018 tambe ta bay haci esey. Lo bay yega y surpsa 800 mil. E ta un crecemento di rond di 2 pa 2.5% porciento compara cu aña pasa. Den e sentido ey tambe e ta bayendo positivo.
Arends a comenta cu e parti central di loke mester enfoca riba dje, ta e experiencia di e turista. Una bes cu e experiencia ta uno positivo, esey siguramente ta yuda sigui mehora e impacto economico cu ta un enfoke hopi grandi. Naturalmente mester wak e capacidad tambe. Pa por brinda e experiencia positivo tin cu wak e capacidad.
Parti di e experiencia kier sigui wak cada biaha mehoracion den esey. Aruba ta hopi conoci. Aruba ta un marquee destination, conoci pa e experiencia hopi bon cu nos ta brinda nos bishitantenan. Esey ta hopi importante. E enfoke e ora ta bira den Low Season. Eynan ta caminda cu tin capacidad caminda cu por sigui crece sin afecta hopi experiencia di e pasaheronan. Esey, con cu bay bin ta un reto. Esey ta e temporada unda cu ta zomer y hopi di e cruceronan ta manda nan barco un otro region. Esey ta e trabao unda cu mester logra convence nan pa bin e banda aki. Sigur inclui Aruba den nan itinerario.
Ora cu ta ricibi turistanan crucero, ta converti nan den stayovers, ta un parti importante di strategia. Esey sigur sigur ta wak cu hopi turista ta bin, nan ta bin cu crucero y ta bin bek como pasahero stayover. Esey ta algo cu ta enfoca hopi riba dje. E ta e strategia hopi importante di ATA y trahando hunto cu APA y otro partnersnan, pa logra esaki.
Un di e cosnan cu ta enfoca hopi riba dje, ta pa midi esey. Si bo por midi’e, e ora sigur bo por tin un miho bista, con e ta desaroya y con bo por sigui afect’e. Pero esey sigur ta un parti importante di nan strategia.
Disgusto cerca comerciantenan
Johnny Gomez tin mas di 20 aña trahando den turismo y e ta un di e comerciantenan cu no ta mucho contento cu e turistanan crucero cu ta yega Aruba. E ta preocupa cu e turistanan cu ta bin cu crucero, no ta cumpra net nada, ni un T-shirt. Gomez ta indica cu e barconan cu ta yega waf, por ta gobierno ta gana. Gomez no sa kico nan ta bin haci Aruba. Gobierno ta haci bon trabao pa trece nan, pero no pa e comerciantenan. Ningun hende no ta cumpra nada.
E busnan mes tur ta bay ariba bashi. Hendenan no ta haciendo nada. Ta compronde cu rond mundo economia ta malo. Pero Gobierno mester sa cu turismo ta nos pilar y tin cu haci algo mas miho. Nan si ta cobra ora cu barco mara, Gomez a bisa finalmente.
