Den presupuesto 2022 Gabinete Wever-Croes a pone e suma cu nan tin intencional pa bay busca bek cerca e empresanan chikito den 2022 p’e sumanan cu supuestamente nan lo a ricibi inhustamente na salarissubusidie. Segun lider di fraccion di AVP, mr. Mike Eman, bao di e descripcion “opvoeren terug te innen loonsubsidie” den cambio riba presupuesto 2022, Gabinete Wever-Croes a anuncia nan determinacion pa bay cobra e empresanan chikito e suma astronomico aki.
Eman kende a cuestiona e asunto aki den Parlamento, a elabora rib’e cifranan cu ta indica cu e cantidad di compania cu lo persigui ta hopi grandi mes. Eman a conclui esaki for di e cifranan di Bureau Arbeidmarktonderzoek y e contestanan di minister Glenbert Croes.
Den e dato y contestanan di e Minister di Labor, e ta informa cu na 2020 un cantidad di 1888 empresa a ricibi demasiado loonsubsidie. E minister ta bisa cu na 2021 e total lo tabata 1424 empresa.
For di e cifranan di e mesun minister por conclui cu na Aruba tin 3181 compania chikito cu 10 of menos empleado. Esaki ta representa 83.3% di e doñonan di trabao na Aruba segun e mesun Bureau Arbeidsonderzoek.
Eman ta agrega cu si analisa e cifranan di e cantidad di empresa chikito (3181) cu 10 of menos empleado, representando 83% di e empresanan na Aruba, anto e probabilidad ta hopi grandi cu un parti hopi grandi di 49 miyon cu Gabinete Wever-Croes ta bay cobra bek lo ta principalmente di e companianan chikito aki.
Eman a comenta cu tur reto cu e companianan y pueblo ta pasando den e ehercicio aki di bay forsa e empresanan chikito aki pa den un aña paga bek e sumanan aki, lo bay ta un otro sla mas p’e empresarionan chikito na Aruba cu ta luchando pa tene nan cabes riba awa.
Eman ta bisa cu ya algun luna pasa a adverti p’e cobramento bek di loonsubsidie no bira algo semehante na e ‘toeslagenaffaire’ na Hulanda caminda miles di famia a bira victima di abuso di poder di e burocracia.
Awo cu Gabinete Wever-Croes a presupuesta 49 miyon como entrada pa 2022, ta bisto cu ta bay tin un cobramento feroz pa alcansa e suma aki.
E lider di fraccion di AVP a expresa hopi preocupacion cu e desaroyo aki mirando cu riba tur front desaroyo social-economico di Aruba ta debilita y cada bes tin mas medida cu ta afecta poder di compra di pueblo, gasto di compania y ciudadania. Den e presupuesto Alternativa pa 2022, fraccion di AVP a presenta diferente alternativa pa cambia e rumbo aki di gobernacion ta aki e Bureau ta raporta cu na Mei 2020 un total di 1661 doño di trabao a haya loonsubsidie.
