Parlamentario di fraccion di Partido di Pueblo Arubano (AVP), Mike de Meza, ta un ingeniero industrial cu amplio trayectorio y conocemento di e mundo petrokimico. Den gobierno, el a fungi como minister di energia. E siman aki, el a bin afo pa splica e embergardura di e decision di gobierno pa stop cu hedging.
E no ta kere den e ponencia cu ministernan Evelyn Wever-Croes y Glenbert Croes ta duna cu tal determinacion no ta cay bou di nan autoridad. El a conta tambe con, na varios ocasion, ehecutivonan di WEB a urgi pa cera acuerdo di hedging y cada bes, a bay contra di e conseho ey, resultando den e caos di prijs di awa y coriente cu ta conociendo awendia.
“No solamente na Utilities cu WEB, pero na RDA tambe, caminda Evelyn Wever-Croes a kita profesional, a persigui profesional. Kita tur e directornan profesional pa hinca su primo, pa hinca su ruman, pa hinca su sua den posicion; hende cu no tin ningun experiencia den ramo di industria of tecnologia. A pone nan ey puramente pa sigui instruccion politico y enrikece friends & family. Ta kico mas bo ta spera?,” e parlamentario ta puntra afirmando cu no ta bay tin sincronisacion e ora entre companianan.
“Pasobra ora bo pone profesionalnan un banda, manera trahadonan di WEB, anto bo ta pone na e otro banda, manera mi ta yama nan, cu tur respet, payasonan politico. Anto e ora ey automaticamente bo ta haya e tipo di problema cu nos tin awe. Esaki ta e resultado, gobierno no por bisa cu nan no tabata sa. Evelyn no por bisa cu e no tabata sa of nan a concentra riba turismo; nan a duna instrucción pa duna e hedging; nan a duna instruccion pa stop tur e proyectonan di energia alternativo; nan a duna instruccion pa kibra contract di CITGO. Esaki ta gewoon mente maligno den nos politica awe.
Pa e relato completo, lesa TREMPAN
