Por lo menos dos altocomisario di Cuerpo Policial Aruba tin mas problema na cas, cu den maneha e organisacion di 600 empleado publico, cu mester garantisa orden publico riba nos pais. Tanto yiu di criansa di ex-altocomisario Dolfi Richardson, actual hefe di Nationaal Centraal bureau Terrorismebestrijding, Veiligheid en Interpol (NCTVI) como tambe e actual altocomisario Irma Gordon, a cay cera awe marduga despues di e Parada Nacional di Luz. Ambos yiu tin problema serio cu comportacion y aunke ambos ta mayor di edad, te ainda nan mayornan tin cu carga cu consecuencia di nan envolvimento den gang.
E prome detencion a cay diadomingo marduga, net despues cu e parada a caba di pasa na altura di Royal Plaza Mall. Ey a start un pelea entre dos gang, pa cual polis a yega mesora pa detene e bringadonan. E proceso no a bay facil, pa cual mester a haci uzo di polisnan di Mobiele Eenheid. Ta trata aki di polisnan bon entrena con pa atende cu detencionnan asina den publico. E polisnan ta staciona nan mes strategicamente rond di e problema, di cual un grupo ta atende cu e sospechosonan y e otro grupo ta ‘cuida lomba’ di nan coleganan y evita cu mas hende ta yega cerca pa stroba trabou di polis.
Un di esunnan cu nan a detene den e grupo aki ta Shayron Gordon, yiu homber di altocomisario Irma Gordon. Su rol den e detencion no ta mucho conoci, pero lo por spera di un homber grandi y scapa asina, sabiendo e trabou di su mama, cu e lo move ora nota problema y no keda y stroba trabou di autoridad. Ni e hecho cu el a bisa cu ‘mi mama ta boso hefe’ no a logra intimida e polisnan di Mobiele Eenheid, cu mas smaak e ora ey a transporta e yiu aki pa ward’i polis di Oranjestad, pa eynan present’e dilanti un subfiscal. Parce cu no ta prome biaha cu e ta bay den man di husticia, pa mal comportacion.
E di dos caso y den esaki un acto mucho mas serio, tabata esun di awe mainta na altura di De Molen. Polis a para un auto cu shete homber den dje, di cual dos di nan tabata arma cu un revolver y e otro cu un cuchiu. Nan ta di ‘gang di Dakota’ y a bay Molen pa regla cuenta cu ‘gang di Madiki’. Kico a pasa cu nan kier a bay tira riba e grupo di hobennan di Madiki, no ta conoci. Pero siguridad di De Molen a haya informacion y tabata sa cu nan ta arma, pa cual nan a informa autoridad mesora. Polis, den un esfuerso di activa rapidamente, a para e auto aki, detene e sospechosonan y asina evita un tiramento cu awe lo por tabata fatal.
Ta bin resalta cu entre e sospechosonan deteni den e caso serio aki, ta e yiu homber di criansa di ex-altocomisario Richardson y su casa, cu ta hefe di Scol pa Polis. E pareha tin hopi aña den un funcion di liderazgo den Cuerpo di Polis y ta percura pa recluta polis nobo y pa maneha henter e cuerpo. Pero, ta parce cu na cas e criamento di nan yiu no a bay facil y awendia e ta duna nan hopi dolor di cabes. Aunke mayor di edad, toch e homber hoben aki a opta pa biba den e bida di gang.
Cu e detencionnan aki a demostra cu, den nos sistema hudicial, prizon ta pa tur hende. No ta importa yiu di ken bo ta, pero si bo faya na leynan criminal, e sistema mes ta percura pa bo detencion y ta procesa bo penalmente. Den caso di djis mal comportacion, por spera djis un multa pisa y bo por bay cas. Pero den caso di actonan criminal, manera portacion di arma di candela of conspiracion pa un posibel asesinato den grupo, ta bira henter un trayecto diferente cu … no necesariamente Mami y Papi por yuda bo cu ne.
