Nacionnan Uni a decreta cu 25 di november como fecha pa conscientisa mundo riba violencia contra hende muhe. Aki na Aruba tambe a para y reflexiona riba e fecha aki.
Miangela Ras, hoofd van Dienst di Centro pa Desaroyo di Hende Muhe (CEDEHM) a papia di e tema aki y a bisa cu e fecha aki ta special pa “Let’s make the world orange day”. E ta pa conscientisa mundo riba e hecho cu tin hopi violencia contra hende muhe. E ser femenino ta agredi den tur sorto di forma, fisico, mentalmente y spiritualmente.
E profesionalnan den veld ta consciente cu violencia a crece, pero e cifranan no ta refleha esaki, pasobra e ta busca pakete di alimento pa cria su yiunan, busca otro forma pa yuda su famia. “Nos no por proba cu data cu e violencia a subi.” Awo e prome señal ta ora cu cuminsa pidi pakete alimento, pasobra ora cu bay averigua ta saca afo cu e tin di haber cu violencia contra dje.
Ta hopi cos e hende muhe ta haya su mes confronta cu ne. Su rol a bira mas grandi, e ta mama y traha, wak pa yiu pero tambe yuda wak pa mayornan. Pues su tareanan no paga a bira hopi mas. Esaki si ta proba.
E organisacion internacional di CEPAL a haci un investigacion y a saca afo cu COVID a dal e hende muhe hopi duro, mas ainda esnan di e islanan chikito cu ta depende hopi di turismo. E hende muhe awe ta enfoca pa sobrevivencia di su famia.
CEDEHM su meta ta pa yega na un bon data base, cu por yuda brinda un miho ayudo na e hende muhe. Pero si e por bisa cu e ciclo di abuso ta hopi dificil pa kibra. Mester para keto y averigua kico ta haci e hende muhe vulnerabel na abuso. Ey mester ataca y brinda nan e ayudo necesario pa kibra e ciclo di abuso.
