Mester keda fo’i politica pa 10 aña: Kier cera Benny Sevinger cinco aña y cobr’e un miyon florin

Awe a tuma luga tratamento di e caso di Avestruz, den cual dos fiscal a haci e demanda di castigo pa tur diesdos sospechoso envolvi den e caso. unda cu tin diferente acusado. Henter e caso aki ta relaciona cu supuesto bendemento of corupcion cu tereno di gobierno. Den su requisitoir, fiscal a exigi sea castigo di prizon, boet y trabou comunitario p’e sospechosonan. Den algun caso, unda cu e fiscal mes a ripara cu nan ta mal para, el a pidi “vrijspraak” pa e sospechosonan.

Pa e acusado Ewald Biemans a pidi vrijspraak, mientras pa Curt Harms a pidi pa e haci 100 ora di trabou comunitario y paga 25 mil florin di boet. Pa loke ta trata Mary Winterdaal, cu tabata traha pa Leoncita, a exigi pa declar’e culpabel pero sin castigo. E no ta biba mas na Aruba pa colmo. Pa Rebecca Richardson (yiu di Leoncita), fiscal a exigi un castigo igual na loke el a sinta caba, mas dos luna condicional y dos aña di prueba.

Fiscal ta pidi castigo pa sospechoso den caso Avestruz

Fiscal ta pidi castigo pa sospechoso den caso Avestruz. https://24ora.news/3DRwBB4

Posted by 24ora on Thursday, November 10, 2022

A pidi pa Frederic Every bay cera pa diesocho dia y p’e haci trabou comunitario di 160 ora. Fiscal a pidi pa Franklin Abath sinta seis luna cera den cel, kitando e 31 dianan cu e tabata cera caba. P’e acusadonan Gaby Werleman, Ninosca Nunes y Carlo Mansur, fiscal a pidi dos aña di prizon, kitando locual nan tabata cera caba y pa nan cada un paga 25 mil florin di boet.

Fiscal a exigi tres aña di prizon pa Leoncita Arends, kitando 46 dia cu e tabata cera caba. Riba dje ta exigi pa e paga un boet di 25 mil florin.

P’e sospechoso Pieter Susebeek, fiscal a exigi cuater aña di prizon menos e 34 dianan cu e tabata den detencion preventivo. Tambe pa confisca e suma di 1.3 miyon dollar cu e tin deposita riba su cuenta na ORCO Bank na Corsou.

Pa loke ta trata e sospechoso principal dje caso Avestruz, esta Benny Sevinger, fiscal a exigi un castigo di cinco aña di prizon, kitando e dianan cu el a pasa cera caba. Tambe a exigi pa Sevinger no carga un funcion publico y pa e no subi un lista politico pa un termino di 10 aña largo. Lo encamina un “ontnemingszaak” pa cobra Sevinger mas o menos un miyon florin.

Defensa

Durante tratamento di e caso awe, hues a anuncia, despues di a scucha e demandanan di fiscal, cu tratamento lo sigui dia 12 di december proximo. A pone e dianan 12, 13, 14, 15 y 16 december 2022 disponibel pa tur abogado di e sospechosonan den e caso Avestruz por presenta nan defensa den corte.

• Dia 12 di december pa 8:30 am: Defensa di abogadonan di Sevinger y Susebeek
• Dia 13 di december pa 8:30 am: Defensa di abogadonan di Arends, Richardson, Winterdal y Every + re- en dupliek + ultimo palabra
• Dia 14 di december pa 8:30 am: Defensa di abogadonan di Nunez, Werleman, Mansur + re- en dupliek + ultimo palabra + repliek den caso di Sevinger
• Dia 15 di december (mainta) pa 8:30 am: Defensa di abogadonan di Harms y Abath +re- en dupliek + ultimo palabra
• Dia 15 di december (merdia) pa 1.30 pm: Defensa di abogadonan di Biemans + re- en dupliek + ultimo palabra
• Dia 16 di december pa 8:30 am: Dupliek den caso di Sevinger y ultimo palabra

CASO AVESTRUZ

Ministerio Publico a informa dia 2 di october 2019, dia cu a haci e huiszoekingnan, cu Landsrecherche hunto cu hues-comisario y den cooperacion cu Cuerpo Policial di Aruba, a tene entrada hudicial na diferente luga. E entradanan aki a tuma luga den cuadro di un investigacion penal di Landsrecherche pa posibel delitonan di corupcion y otro echonan castigabel posiblemente cometi relaciona cu otorgamento di terenonan di gobierno.

Mas concretamente: E investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di pais Aruba den e añanan 2009 te 2017. Ademas ta investiga e rol di ex-minister Benny Sevinger den esaki.