Awe Parlamento a haya un briefing di representantenan di ECLAC (United Nations Economic Commission for Latin America and Caribbean) hunto cu e comicion di Aruba encarga cu implementacion di SDG’s.
E siman aki nan a topa cu varios organisacion tanto gubernamental como fundacionnan y tabatin un seminario na cual miembronan di Parlamento y fraccion tambe a participa. Por bisa cu gobierno anterior a pone hopi enfasis den traha conhuntamente cu United Nations pa loke ta trata “global goals” y ta continua pa asina implementa e diferente metanan. Por bisa Aruba ta bayendo den rumbo positivo y mos tin puntonan fuerte manera nos logronan ariba tereno di energia solvable y berde, combatimento di pobresa enbista cu nos tin nos “welfare” bon regla y tin seguro general medico (AZV), nos infrastructura tambe ser considera den un bon estado y nos servicio di internet y tecnologia di internet tambe ta cana positivo. Ta necesario si un “nulmeting” y cooperacion entre instancianan pa nos por haya dato. Obtencion di dato ta ser considera como un reto, aunke tin varios instancianan gubernamental tin bon sistema di colecta y comparti dato, tog ta necesario mas cooperacion y coordinacion pa cu coleccion di informacion.
Por bisa tambe cu mundialmente desaroyo di nos hubentud ta un meta cu lo mester haya hopi antencion. Wyatt-Ras ta trece padilanti cu ya caba na varios ocasion a haya presentacionnan di representantenan di e comicion encarga cu e metanan mundial y cu den reunionnan cu paisnan den Reino tambe a pone enfasis den trata e metanana mundial pa cada pais por analisa y duna feedback con ley nan ta y con pa logra e diferente metanan. Ta di spera cu e gobierno aki igual cu gobierno Eman II lo por sigui pone enfasis pa por logra metanan importante pa desaroyo di nos pais y di metanan mundial.
