Parlamentario Mervin Wyatt-Ras durante conferencia di prensa semanal di Fraccion di AVP a elabora encuanto di e cantidad di e casonan di COVID-19 cu ta aumentanto drasticamente.
Ta uza e cifranan di DVG di dia 4 di augustus 2021. Ta trata di 123 caso nobo pa dia di cual tin 116 ta esunnan local y 7 turista. Esaki ta contrario na un tempo pasa unda tabatin mas caso di turista, despues casi igual di e casonan di local y di e turistanan. Awo por nota cu a bira cu tin mas local infecta cu mas turista.
E ‘Postitivity Rate’ bao local ta 33%. Esaki ta un cifra halto. E cantidad di casonan activo ta 630 y e cantidad di fayecimento of morto ta 111. Ta lamentabel y tristo cu nos cuidadanonan ta perde nan bida door di COVID-19, Wyatt-Ras ta remarca.
E cantidad di contagionan semanal ta aumentando cu promedio 68 caso y e “Positivity Rate” semanal ta 28%.
Den Hospital na e momentonan aki por constata cu tin 19 pashent interna, di cual 5 den ICU y 14 riba afdeling.
Por a tende of scucha di esunan cu ta traha na Hospital cu ta yegando na limite di pashent den ICU pa motibo cu e capacidad di ICU ta di 6 pashent. E capacidad a wordo aumenta un tempo pasa ora nos pais a haya sosten di Hulanda RIVM, VWS y di Merca pa medio di diferente profesionalnan cu a bin sostene Hospital. Sinembargo na e momento aki no tin e capacidad manera tabata anterior. Ta un preocupacion hopi grandi na e momento aki cu Hospital no tin capacidad y hayando mas caso di COVID. Profesionalnan medico ta trahando “around the clock” sin mucho descanso. Esaki ta un situacion hopi preocupante pa nos pais. Pa loke ta trata e informacion cu nos a ricibi di personanan interna, tin entendi cu 89.4% di pashentnan interna den hospital no ta vacuna. Esey ta bisa algo di efecto di vacuna. Por agrega cu di e 116 localnan infecta cu COVID 63% no a vacuna y 39% si vacuna. Kiermeen si un persona vacuna toch tin riesgo di contagio, sinembargo for di e cifranan por bisa cu toch esunnan cu a vacuna no ta ‘end up’ asina lihe den hospital y cu reaccionnan hopi severo. Pues te ainda ta mustra cu esan cu a vacuna tin bentaha riba esunnan cu no a vacuna. Sinembargo ta keda cu tin persona den nos comunidad cu ta scoge pa no vacuna y tin hopi persona cu no tin suficiente informacion pa tuma e decision pa vacuna. Ta importante pa gobierno en bes di ta ocupa solamente cu tur e asuntonan di formacion ta sigui cu e proceso di concientisa nos ciudadanonan encuanto e importancia di tuma e stapnan y procedurenan di higiena na serio y pa duna informacion encuanto beneficionan di un persona si e vacuna. Bo por bisa tambe cu den diferente establecimento cu bo bishita bo ta mira no tin uso di tapaboca, no ta usa handsanitizer, no ta controla mas si nos hendenan ta cumpli cu rekisitonan. Gobierno y profesionalnan mester duna informacion pa nos hendenan ta mas cauteloso cu nos salud paso nos salud ta di nos e ta nos tin cu proteha nos mes.
Por a tuma nota cu tin necesidad na vacuna y cu ayera a yega 12.825 vacuna Aruba. E grupo di preocupacion tambe segun Wyatt-Ras ta nos muchanan. Paso di muchanan bao 12 anja no ta wordo vacuna. E grupo aki ora cu skol cuminsa mita di augustus si nan wordo contagia y nan bin cas contagia mayornan y demas famia tin chens di ser contagia. E preocupacion aki ta grandi en bista cu e contagio di e variante Delta ta bai hopi rapido. Esnan vulnerable cu no vacuna tin chens hopi grandi di tin consecuencianan serio si nan ser contagia.
Segun Wyatt-Ras nos no kier ni pensa pa yega asina leu manera a yega na maart 2020, caminda cu mester a bin un “lockdown”.
Mirando cu nos ta un pais turistico tin cu tene den consideracion e “reisadviezen” cu ta wordo duna dor di otro paisnan pa por biaha pa cierto paisnan y nos pais. Si un nos no ta tene nos mes na precaucionnan y e cantidad di casonan sigui subi por yega asina leu cu nos no ta wordo considera mas como un pais cu por garantisa seguridad ni e salud pa personanan cu ta bin bishita nos pais. Actualmente nos ta cai den e code geel di paisnan pa bishita, locual ta bon pa nos. Sinembargo nos por bai den code oranje of te hasta code cora. Si nos yega code corra lo bai duna un conseho negativo pa bishita nos pais y ban spera nos no yega na tal extremo paso esaki lo afecta nos turismo y nos economia grandemente. Ainda nos ta recuperando di e cantidad di persona cu a perde trabou pa motibo di e prome ola.
Wyatt-Ras ta haya ta di importancia pa preveni pa nos no yega den tal extremo. Ta miho preveni cu yora malay.
Considerando cu nos pueblo ta den temporada di vacacion, cu nos hendenan ta bai den exterior, ta haci uso di nos beachnan y ta bishita establecimentonan den cantidad grandi ta necesario cierto precuacionnan pa proteha nos mes y otronan. Paso p.e. ora un persona bisti su mondkapje no solamente e ta proteha su mes sino e ta proteha otronan tambe. E cooperacion entre nos poblacion mester wordo fortifica unda un ta proteha otro. Pa loke ta trata e pandemia aki Wyatt-Ras lo manda preguntanan pa minister di Salubridad pa asina haya mas claridad. Pasobra na e momento aki ta di importante pa pone atencion ariba nos salubridad y manera nos por a tuma nota gobierno aki ta juist corta den salubridad y tin plan den e landspakket pa e area salubridad bai entrega. Esaki no ta justo. Wyatt-Ras ta kere mescos cu gobierno of e ministro presidente demisionario por previlegia su swa pa asina haya sumanan pa e por bira director di WEB Aruba NV y asina duna schat di placa tambe na e directornan cu ta wordo retira, e por ta asina fuerte pa kita e medidanan of manera cu el a bisa papia cu Hulanda pa no bin cu medida den cuido.
