Awe mainta 9;00 am Parlamento di Aruba lo tin un reunion publico pa apodera Minister Dangui Oduber pa yega na un acuerdo cu e compania Lee Tofanelli and Associates Inc. pa un suma di alrededor di dos miyon florin. Un ke otro tin di haber cu un compromiso dudoso cu Minister Eddie Briesen a cera na 2009, durante su “afscheidbeleid” sin cu Oficina di Turismo tabata sa, ni a conseha y tampoco tabatin e suma presupuesta den e presupuesto di Ministerio di Turismo. Pa e compania no bay tras di Eddie Briesen personalmente, ta opta pa yega na un “dading” pa absolve e responsabilidad financiero di e ex-minister.
Tur wowo riba RAIZ
Awe tur wowo ta riba e dos parlamentarionan di fraccion di Raiz, siendo esunmam cu ta carga e antorcha di integridad den e gobierno aki. Ta con por exonera un ex-minister cu ta sospechoso di husticia awe? Ta comprendibel cu MEP lo haci tur posibel pa e ley pasa pa nan no carga e consecuencia politico pero nan mester sosten di Misha Raymond y Raymond Kamperveen di Raiz pa por logra. Den caso cu por lo menos un di e dosnan aki no para pa corupcion y decisionnan robes, e ley lo no pasa den Parlamento di Aruba.
Di minister pa “top-consehero”
No ta trata di cualkier consehero, sino mas bien di e “top consehero” di Gabinete Wever-Croes II cu por lo menos dos contract “dienstverlening overeenkomst” (DVO) na Ministerio di Energia y na Ministerio di Enseñansa y Deporte, banda di su envolvimento den no menos cu tres compania of fundacion di gobierno. Den RdA e ta ocupa e funcion di presidente di cual ta pag’e, separa di e dos contract DVOnan cu e tin caba, adicionalmente un suma di por lo menos tres mil florin pa luna. Den e otro compania y fundacion ta varia tambe entre dos pa tres mik florin pa luna pa su envolvimento den e hunta di comisario of hunta di supervision. Banda di su pensioen di minister, ta haci Eddy Briesen un di e ex-ministernan di MEP miho compensa na Aruba!
Contract “gordo” na Santa Rosa riba nomber di su yiu
Pero comosifuera poco, a bin topa cu un DVO na Santa Rosa tambe di un suma cuantioso pa luna, ta papia di 30 mil florin pa luna, cu ta poni riba nomber di e yiu muhe di e ex-minister. Pa colmo e tabata consehero principal di Ministerio di Agricultura, encabesa pa Minister Chris Romero, den Gabinete Wever-Croes I. Ta acus’e di lo a “fix” su mes na momento cu a bin eleccion y cu Romero lo no regresa mas como minister. A laga un bon contract atras na LVV Santa Rosa, sin cu nunca e yiu muhe a presenta na e departamento ni pa traha ni pa conseha. Es mas, e yiu ta traha na un centro di hende grandi na Wayaca, pues no ta ni traha den gobierno!
Gabinete Wever-Croes II mes a keh’e
Esaki ta haci cu mesora, despues cu a bin cambio di asignatura, cu a topa cu e “sorpresa” aki. Conseho di Minister a opta pa, contrario con a atende cu Minister Guillfred Besaril, cu a haya chens pa paga bek loke el a malversa, aki si a bay Ministerio Publico mesora y asina laga husticia persigui e ex-mandatarionan, esta Chris Romero y Eddie Briesen. Ora mira con e ministernan awor ya bisa di a keda straña cu tin investigacion y “inval” na cas di nan top-consehero, ta straño. Pasobra e pregunta ta surgi mesora…ta ken a keh’e anto? Acaso a keh’e y lubida mesora cu ta boso colectivamente a opta pa caba cu e carera politico di Romero y cu e carera largo di Briesen, cu a sirbi e pais como parlamentario, minister y consehero di Partido MEP desde aña 1983. Na aña 2013 el a participa ultimo biaha como candidato riba lista di MEP, pues un trayecto impresionante di 30 aña activo como politico ta caba awo cu un mancha masha mahos y awo ta somet’e na investigacion y posibel condena pa malversacion cu plac’i pueblo bou gobernacion di MEP mes.
Raiz ta miho cu MEP den scoge supervisor den directivanan
Pa caba cu e forma con e gobierno aki ta reacciona, den sentido di ta sorprendi di e investigacion, ta bon pa aclaria algun decision descabeya cu nan mes a tuma. Ta asumi cu esaki ta decisionnan cu MEP mes a tuma pa complace y enrikece nan mesun hendenan. Pasobra, por tuma nota cu den e huntanan di comisario of supervision cu ta resorta bou di Partido Raiz, ta nota cu ta tene cuenta cu expertonan riba diferente tereno pa yuda e companianan. Pues ta aplica un sorto di “schets profiel” den e directivanan, cu hurista, accountant, profesionalnan den advisory, cu por controla e directornan di e companianan. Asina por mira cu asina cu Minister Geoffrey Wever a asumi su funcion y a tuma mando di SETAR, cu mesora a saca ex-pareha di Minister Romero cu tabata den directiva y tambe ex-Prome Minister Nel Oduber. Na nan luga a hinca profesionalnan cu sa di telecomunicacion, di finansa, di maneho y di ley!
Pa mas lesa TREMPAN.COM.
