Diadomingo merdia alrededor di 12:00 pm a sosode un otro accidente n’e crusad’i John G Eman cu Emmastraat. T’un crusada conoci pa tin varios accidente, casi nos por bisa; diariamente. E nota extra esfuerso di parti di gobierno pa evita accidente n’e dicho crusada, asina mes accidente ta keda sosode. Tin suficiente borch’i trafico na e bandanan di caminda y awo hasta drempel. Asina mes automobilistanan no ta respeta y haya nan mes envolvi den accidente.
E biaha aki tabata entre un auto marca Hyundai modelo Accent cu un Chevrolet color blauw. E chauffeur di e Chevrolet a ricibi un sorpresa na momento cu Accent a bula su dilanti sin duna preferencia. E impacto tabata fuerte y cu hopi daño material. E chauffeur di e Accent tabata keha di basta dolor na su rudianan.
Mirando cu ta trata di un turista, e turista di habla spaño ta na altura di e factura cu e lo ricibi despues di e accidente aki. Personal di seguro a presenta p’asina documenta e accidente aki.
