S.V. River Plate a caba di batisa nan uniform nobo, danki na patrocinio di Tropical Bottling Company y nan producto “Sprite”. Riba dje, nan ta celebrando 71 aña di existencia. E team ta haya cu sigur perfeccion no ta existi pero nan ta bay pa excelencia.
Hunto cu e colaboracion y partnership cu Sprite sigur River Plate lo cuminsa yega e nivel ey, asina Michealangelo Boekhoudt, presidente di S.V. River Plate ta afirma.
Diasabra nan ta enfrenta Britania y coach Shermir Schotborg ta conta cu preparacionnan tabata duro, intenso. “Tur cu ta para den top seis awor aki ta un team duro. Nos a bin di ultimo wega te aworaki preparando hopi duro. Sperando cu nos bay cu e bon resultado den nos man tambe,” e coach ta bisa.
E team tin 30 hungado, algun cu no ta ful cla ainda, tambe un paar di hoben di 15 aña biniendo ariba. River Plate kier gradici Dios pa duna e hungadonan e talento.
Josthan Maduro ta un keeper cu a honra p’e participa den tryouts na Hulanda. E ta conta cu el a keda selecta di 18 hungadonan di Aruba cu un programa yama TDS, y Josthan tabata un di e promenan cu a bay tryout na Hulanda.
“Mi kier a bisa hopi danki na hendenan di AVB pa scoge mi, Chris di Fifa y Sprite p’e yudansa”. Josthan como keeper ta conta cu su experiencia na Hulanda ta hopi diferente mirando cu ayabanda e nivel di wega ta hopi mas halto, e veld tambe ta haci un diferencia grandi.
Un pabien ta bay pa S.V. River Plate y hopi exito pa nan sigui logra tur nan meta pa futuro.
