Entrante mañan, 11 di april 2022, Center for Disease Control (CDC) na Merca ta bay cambia Aruba di puesto riba e lista di nivel di risico pa biahe di nivel 4 pa nivel 3. Minister di turismo, Dangui Oduber, a publica e noticia alentador aki riba su pagina di Facebook. Mas cu claro, ta spera cu e cambio aki lo bay trece cu ne mas fluho di turista, pues añadiendo na nos recuperacion turistico y economico. CDC ta categorisa cuater nivel pa loke ta trata nivel di risico pa biahe relaciona cu COVID-19. Nivel 4 ta esun di mas halto, pues cu e nivel aki ta recomenda pa purba preveni di biaha p’e destinonan aki. Nivel 3 ya caba ta kita dicho recomendacion y ta recomenda pa e biahero ta completamente vacuna prome cu biaha p’e destinacion.
Algun siman pasa caba tabatin algun trahado di e sector turistico, algun guia turistico di waf, algun trahado di ‘watersports’ cu a bin expresa nan preocupacion relaciona cu e nivel imponi pa CDC ya cu esaki mas cu claro tabata afecta e turismo na Aruba. Cu e grato noticia aki ta spera cu en berdad nos mira mas turista y sigui riba e caminda di recuperacion.
